വെണ്ടയ്ക്ക പുളി
ആവശ്യമുള്ള സാധനങ്ങൾ :
വെണ്ടയ്ക്ക : 6 എണ്ണം
പുളി : ഒരു നാരങ്ങ വലുപ്പത്തിൽ
മുളകുപൊടി : 2 ടീസ്പൂൺ
മല്ലിപ്പൊടി : 4 ടീസ്പൂൺ
മഞ്ഞപ്പൊടി : 1/8 ടീസ്പൂൺ
ഉലുവ : ഒരു നുള്ള്
ചെറിയ ഉള്ളി : 6 എണ്ണം
ചിരവിയ തേങ്ങ : ഒരു കപ്പ്
ഉപ്പ് ആവശ്യത്തിന്
എണ്ണ : ഒരു ടേബിൾസ്പൂൺ
കടുകു വറക്കാൻ :
കടുക് : ഒരു ടീസ്പൂൺ
എണ്ണ ആവശ്യത്തിന്
ചെറിയ ഉള്ളി : 5 എണ്ണം
കറിവേപ്പില : ഒരു തണ്ട്
മുളക് : ഒരെണ്ണം രണ്ടായി പൊട്ടിച്ചത്
ചെയ്യുന്ന വിധം :
വെണ്ടയ്ക്ക കഴുകി അര ഇഞ്ചു നീളത്തിൽ മുറിച്ചു വെക്കുക.
ഒരു ഫ്രൈപാനിൽ എണ്ണ ചൂടാക്കി വെണ്ടയ്ക്ക കഷ്ണങ്ങൾ നിറം മാറും വരെ നന്നായി വഴറ്റുക.
പുളി 20 മിനിട്ടു നേരം ഒന്നര കപ്പു വെള്ളത്തിലിട്ട ശേഷം പിഴിഞ്ഞെടുത്ത വെള്ളം മാറ്റി വെക്കുക.
ഒരു ചീനച്ചട്ടിയിൽ ഒരു ടീസ്പൂൺ എണ്ണ ചൂടാക്കി ഉലുവായിട്ടു നിറം മാറുമ്പോൾ തീ കുറച്ചു മുളകുപൊടിയും മല്ലിപ്പൊടിയും ഇട്ട് ഇളക്കുക.
തണുത്ത ശേഷം ഉള്ളി ചേർത്തി അരച്ചു വെക്കുക. തേങ്ങയും അരച്ച് വെക്കുക.
പുളി വെള്ളത്തിൽ ഉപ്പും അരച്ച മസാലയും മഞ്ഞപ്പൊടിയും വെണ്ടക്കയും ചേർത്തി തിളപ്പിക്കുക.
അഞ്ചു മിനിട്ടു തിളച്ച ശേഷം തേങ്ങാ അരച്ചത് ചേർത്തുക. ഒരു മൂന്നു മിനിട്ടു കൂടി തിളച്ച ശേഷം അടുപ്പിൽ നിന്നും മാറ്റി വെക്കുക.
ഒരു ചീനച്ചട്ടിയിൽ എണ്ണ ചൂടാക്കി കടുകു പൊട്ടിക്കുക. ഇതിൽ മുളകു രണ്ടായി പൊട്ടിച്ചതും ഉള്ളി ചെറുതായി അരിഞ്ഞതും കറിവേപ്പിലയും ചേർത്തി നന്നായി വഴറ്റി ഈ കറിയിൽ ചേർക്കുക.
ചോറിന്റെ കൂടെ കഴിക്കാൻ നന്നായിരിക്കും.
