Mutton masala

മട്ടൺ മസാല 

ആവശ്യമുള്ള സാധനങ്ങൾ :

ആട്ടിറച്ചി (Mutton)                  : 1/4 കിലോ 

വലിയ ഉള്ളി                            : 2 എണ്ണം 

തക്കാളി                                  : 2 എണ്ണം 

ഇഞ്ചി വെളുത്തുള്ളി പേസ്റ്റ്       : 1 ടേബിൾസ്പൂൺ 

മുളകുപൊടി                             : 1 ടേബിൾസ്പൂൺ 

മല്ലിപ്പൊടി                              : 1 ടേബിൾസ്പൂൺ 

മഞ്ഞപ്പൊടി                           : 1/4 ടീസ്പൂൺ

പെരുംജീരകപ്പൊടി                : 1/4 ടീസ്പൂൺ  

മട്ടൺ മസാലപ്പൊടി               : 1 ടീസ്പൂൺ 

തൈര്                                    : 1/4 കപ്പ് 

എണ്ണ                                     : 3 ടേബിൾസ്പൂൺ 

ഉപ്പ് ആവശ്യത്തിന് 

മല്ലിയില അരിഞ്ഞത്             : ഒരു ടേബിൾസ്പൂൺ 

ചെയ്യുന്ന വിധം :

മട്ടൺ ചെറിയ കഷ്ണങ്ങളാക്കി മുറിച്ചു കഴുകി വെക്കുക.

ഉള്ളി ഘനമില്ലാതെ അരിഞ്ഞു വെക്കുക. തക്കാളിയും അരിഞ്ഞു വെക്കുക.

മുളകുപൊടി, മല്ലിപ്പൊടി,മഞ്ഞപ്പൊടി, പെരുംജീരകപ്പൊടി, മട്ടൺ മസാലപ്പൊടി എന്നിവയെല്ലാം അല്പം വെള്ളം ചേർത്തു പേസ്റ്റ് ആക്കി വെക്കുക.

ഒരു പ്രഷർ കുക്കറിൽ എണ്ണയൊഴിച്ചു ഉള്ളിയിട്ടു ബ്രൗൺ നിറം വരുന്നതു വരെ വഴറ്റുക. ഇതിൽ ഇഞ്ചി വെളുത്തുള്ളി പേസ്റ്റ് ഇട്ടു ഒന്നുകൂടി വഴറ്റി തീ കുറച്ചു മസാലപ്പൊടി പേസ്റ്റും ചേർത്തി നന്നായി വഴറ്റി തക്കാളി അരിഞ്ഞതു ചേർത്തി വഴറ്റുക. ഇതിൽ മട്ടൺ  കഷ്ണങ്ങളും തൈരും ചേർത്തി വഴറ്റണം. മട്ടൺ നിറം മാറിയാൽ അര  കപ്പു ചൂടുവെള്ളവും ഉപ്പും  ചേർത്തി നന്നായി ഇളക്കി കുക്കർ അടച്ചു വേവിക്കുക. ഒരു വിസിൽ വന്നാൽ തീ കുറച്ചു ആറോ ഏഴോ വിസിൽ വരുന്നതു വരെ വേവിക്കുക.

തീ കെടുത്തി പ്രഷർ പോയ ശേഷം കുക്കർ തുറന്നു ഇളക്കുക. വെള്ളം കൂടുതലാണെങ്കിൽ ഒന്നു കൂടി അടുപ്പിൽ വെച്ചു അല്പം കുറുകുന്നതുവരെ തിളപ്പിക്കുക,  ഇടക്ക്‌ ഇളക്കി കൊടുക്കണം അല്ലെങ്കിൽ അടിയിൽ പിടിച്ചേക്കാം.  ഇടത്തരം അയവോടെയായിരിക്കണം ഈ കറി. 

വിളമ്പുന്ന പാത്രത്തിലേക്കു മാറ്റി മേലെ മല്ലിയില തൂവുക. 

ചോറിനും ചപ്പാത്തിക്കും എല്ലാം ചേരുന്ന കറിയാണിത്.

Masala Dosa

മസാല ദോശ

ആവശ്യമുള്ള സാധനങ്ങൾ :

പുഴുങ്ങലരി                :  2 കപ്പ് 

പച്ചരി                       : 1 കപ്പ് 

ഉഴുന്ന്                        : 1/4 കപ്പ് 

ഉലുവ                        : 2 ടേബിൾസ്പൂൺ

ഉപ്പ് ആവശ്യത്തിന് 

നെയ്യ്                        : 3 ടേബിൾസ്പൂൺ  

മസാലക്കു വേണ്ടത് :

ഉരുളക്കിഴങ്ങു്             : 2 വലുത് 

വലിയ ഉള്ളി              : 1 വലുത് 

പച്ചമുളക്                   : 2 എണ്ണം 

ഇഞ്ചി                        : ഒരു ചെറിയ കഷ്ണം 

ഉപ്പ് ആവശ്യത്തിന് 

എണ്ണ                         : ഒരു ടേബിൾസ്പൂൺ

കറിവേപ്പില               : ഒരു തണ്ട് 

മല്ലിയില അരിഞ്ഞത്  : ഒരു ടേബിൾസ്പൂൺ

ചെയ്യുന്ന വിധം: 

ഉഴുന്നും ഉലുവയും കൂടി ഒന്നിച്ചു വെള്ളത്തിലിടുക.  പച്ചരിയും പുഴുങ്ങലരിയും കൂടി ഒന്നിച്ചു വെള്ളത്തിലിടുക. ഒരു മൂന്നു മണിക്കൂർ കഴിഞ്ഞാൽ ഉഴുന്നും അതിനു ശേഷം അരിയും അരച്ച ശേഷം ഒന്നിച്ചു കലക്കി ഉപ്പും ചേർത്തി നന്നായി കലക്കി ആറു  മണിക്കൂറെങ്കിലും  പുളിക്കൻ വെക്കുക.  തലേന്നു വൈകുന്നേരം അരച്ചു വെച്ചു  രാവിലെ നന്നായി കലക്കിയ ശേഷം ദോശ ചുടാവുന്നതാണ്.

ഉരുളക്കിഴങ്ങു് പ്രഷർ കുക്കറിൽ അല്പം വെള്ളം ചേർത്തി വേവിക്കുക.  മൂന്നു വിസിൽ വന്നാൽ തീ കെടുത്തി കുക്കർ ആറിയ ശേഷം തുറന്നു ഉരുളക്കിഴങ്ങിന്റെ തോലു കളഞ്ഞു വെക്കുക.

ഉള്ളിയും പച്ചമുളകും ഇഞ്ചിയും ഇടത്തരം കഷ്ണങ്ങളായി അരിഞ്ഞു വെക്കുക.

ഒരു പാനിൽ എണ്ണ ചൂടാക്കി ഉള്ളിയും പച്ചമുളകും ഇഞ്ചിയും ഒന്നു വഴറ്റിയ ശേഷം വേവിച്ച ഉരുളകിഴങ്ങു പൊടിച്ചിട്ട് അല്പം വെള്ളവും ഉപ്പും മഞ്ഞപ്പൊടിയും  ചേർത്തി വേവിക്കുക. വെന്തു വെള്ളം വറ്റിയ ശേഷം വാങ്ങി വെച്ച് കറിവേപ്പിലയും മല്ലിയിലയും ചേർത്തി വെക്കുക.

ദോശ തവ ചൂടാക്കി  ഒരു തവി മാവെടുത്തു നടുവിൽ ഒഴിച്ച് ഒപ്പം വട്ടത്തിൽ പരത്തി  ഒരു ടീസ്പൂൺ നെയ്യൊഴിച്  (ഇടത്തരം തീയിൽ) ഒന്നു വെന്ത ശേഷം  രണ്ടു ടേബിൾസ്പൂൺ മസാലയെടുത്തു ഒരു ഭാഗത്തു പരത്തി വെച്ച  ശേഷം ബാക്കി ഭാഗം ഒപ്പം മടക്കി ഇളം ബ്രൗൺ നിറം വന്നാൽ മെല്ലെ ദോശക്കല്ലിൽ നിന്നും എടുത്തു മാറ്റുക.

ഇതുപോലെ ബാക്കി മാവുകൊണ്ടും ദോശയുണ്ടാക്കി ചൂടോടെ വിളമ്പാം.

 മസാല ദോശ റെഡിയായി!   നല്ല തേങ്ങാ ചട്ണിയും കൂട്ടി ചൂടോടെ കഴിക്കാൻ സ്വാദുണ്ടാവും.

  

Onion Pakoda (venkaya pakoda)

ഉള്ളി പക്കോട

ആവശ്യമുള്ള സാധനങ്ങൾ :

വലിയ ഉള്ളി                             : 1 വലുത്‌ 

കടലമാവ്                                 : 1 കപ്പ് 

അരിപ്പൊടി                              : 3 ടേബിൾസ്പൂൺ

ഉപ്പ് ആവശ്യത്തിന് 

പച്ചമുളക്                                 : 2 എണ്ണം

കായം                                     : 2 നുള്ള് 

കറിവേപ്പില                            : ഒരു തണ്ട് 

എണ്ണ വറുക്കാൻ ആവശ്യത്തിന് 

ചെയ്യുന്ന വിധം :

ഉള്ളി ഘനമില്ലാതെ അരിഞ്ഞു വെക്കുക.   പച്ചമുളക് ചെറുതായി അരിഞ്ഞു വെക്കുക.

കടലമാവും അരിപ്പൊടിയും അല്പം ഉപ്പും കായപ്പൊടിയും ചേർത്തി കലർത്തി വെക്കുക.

അരിഞ്ഞ ഉള്ളിയിൽ അല്പം ഉപ്പും ചേർത്തി കൈകൊണ്ടു നന്നായി ഞരടി വെക്കുക.

 ഇതിൽ കലർത്തി വെച്ച കടലമാവ്  കുറേശ്ശേ ചേർത്തി നന്നായി കലർത്തി വെക്കുക.  ആവശ്യമെങ്കിൽ അല്പം വെള്ളം തളിക്കാം.

ഒരു ചീനച്ചട്ടിയിൽ എണ്ണ  ചൂടാക്കാൻ വെക്കുക. ഈ ചൂടായ എണ്ണയിൽ നിന്നും ഒരു ടേബിൾസ്പൂൺ എടുത്തു കലക്കി വെച്ച മാവിൽ ചേർത്തി നന്നായി കലർത്തുക.

 കുറേശ്ശേ എടുത്തു  ചൂടായ എണ്ണയിലേക്കു ഇട്ടു (പ്രത്യേകിച്ചു  ആകൃതിയൊന്നും വേണ്ട) ഇളം ബ്രൗൺ നിറമായാൽ എണ്ണയിൽ നിന്നും കോരിയെടുക്കുക. ബാക്കി മാവും ഇതുപോലെ ചെയ്തു ചൂടോടെ നല്ല ചൂട് ചായയുടെ കൂടെ കഴിക്കാം. 

 

Uzhunnu Vada

ഉഴുന്നു വട 

ആവശ്യമുള്ള സാധനങ്ങൾ:

ഉഴുന്ന്                            : 2 കപ്പ് 

പച്ചമുളക്                      : 1 ചെറുതായി അരിഞ്ഞത് 

തേങ്ങാ കഷ്ണം               : ഒരു ടേബിൾസ്പൂൺ 

കുരുമുളകു ചതച്ചത്  : 1 ടീസ്പൂൺ 

ഉപ്പ് ആവശ്യത്തിന് 

എണ്ണ വറുക്കാൻ ആവശ്യത്തിന് 

ചെയ്യുന്ന വിധം :

ഉഴുന്ന് രണ്ടു മണിക്കൂർ വെള്ളത്തിലിടുക. രണ്ടു മണിക്കൂറിനു ശേഷം നന്നായി കഴുകി  കഴിയുന്നത്ര വെള്ളമില്ലാതെ അരച്ചെടുക്കുക. മിക്സിയിൽ അരക്കാൻ  ബുദ്ധിമുട്ടുണ്ടെങ്കിൽ അല്പം വെള്ളം തളിച്ച് അരക്കാം.

ഈ അരച്ചുവെച്ച മാവിൽ ഉപ്പും കുരുമുളകു ചതച്ചതും തേങ്ങ കഷ്ണങ്ങളും (ചെറുതായി പല്ലു പോലെ അരിഞ്ഞത് ) ചേർത്തി നന്നായി കലർത്തി വെക്കുക.

ചീനച്ചട്ടിയിൽ വറുക്കാൻ പാകത്തിന് എണ്ണ ചൂടാക്കുക.

കൈവെള്ളയിൽ അല്പം വെള്ളം തടവി ചെറിയ ഒരു ഉരുള മാവെടുത്തു കൈയിൽ വെച്ചു ചെറുതായി പരത്തി  വിരലു കൊണ്ട് നടുവിൽ ഒരു തുളയും  ഇട്ട്  ചൂടായ എണ്ണയിലേക്കിട്ട്  രണ്ടു ഭാഗവും മൊരിയുന്നതു വരെ വറുത്തെടുക്കുക. 

ചെറിയ തീയിൽ വറുത്തെടുക്കണം എന്നാലേ വടയുടെ ഉൾഭാഗം നന്നായി വെന്തു  പുറം ഭാഗം ഇളം ബ്രൗൺ നിറം ആവുകയുള്ളൂ. ഇങ്ങനെ ബാക്കി മാവും  ഉപയോഗിച്ച് വടയുണ്ടാക്കി  ചൂടോടെ ചട്ണിയും കൂട്ടി കഴിക്കാം.

Vellappayar & manga pulikari

ആവശ്യമുള്ള സാധനങ്ങൾ :

വെള്ളപ്പയർ                        : 1/4  കപ്പ് 

മാങ്ങ                                  : 1/2 

വഴുതിനങ്ങ                         : 1 

മുളകുപൊടി                         : 1/2 ടീസ്പൂൺ 

മഞ്ഞപ്പൊടി                       : 1/8  ടീസ്പൂൺ 

ഉപ്പ് ആവശ്യത്തിന് 

തേങ്ങ ചിരവിയത്              : 1/2 കപ്പ് 

ചെറിയ ഉള്ളി                      : 8 എണ്ണം 

പച്ചമുളക്                             : 1 

കടുക്                                 : 1/2 ടീസ്പൂൺ 

എണ്ണ                                 : 1 ടേബിൾസ്പൂൺ 

ചുവന്ന മുളക്                      : 1 രണ്ടായി പൊട്ടിച്ചത് 

മല്ലിയില അരിഞ്ഞത്         : ഒരു ടേബിൾസ്പൂൺ 

ചെയ്യുന്ന വിധം :

വെള്ളപ്പയർ പ്രഷർ കുക്കറിലിട്ടു വേവിക്കുക.

വഴുതിനങ്ങ നാലായി കീറി വെള്ളത്തിലിട്ടു വെക്കുക.

തേങ്ങ മിക്സിയിലിട്ട് അരച്ചുവെക്കുക.   ചെറിയ ഉള്ളി ചെറുതായി അരിഞ്ഞു വെക്കുക.

മാങ്ങ ഇടത്തരം കഷ്ണങ്ങളായി മുറിച്ചതും മുറിച്ചുവെച്ച വഴുതിനങ്ങയും  കൂടി   വേവിച്ച വെള്ളപ്പയറിലിട്ടു ഉപ്പും മുളകുപൊടിയും മഞ്ഞപ്പൊടിയും ചേർത്തി വേവിക്കുക. വെന്ത ശേഷം അരച്ചുവച്ച തേങ്ങയും ചേർത്തി രണ്ടു മിനിട്ടു   തിളപ്പിക്കുക. 

ഒരു ചീനച്ചട്ടിയിൽ എണ്ണയൊഴിച്ചു കടുകിട്ടു പൊട്ടുമ്പോൾ മുളകു പൊട്ടിച്ചതു ചേർത്തി ഇളക്കി  ഉള്ളി അരിഞ്ഞതും ചേർത്തി വഴറ്റി കൂട്ടാനിൽ ഒഴിക്കുക. 

ഇടത്തരം അയവോടെയുള്ള കറിയാണിത്  അതനുസരിച്ചു വെള്ളം ചേർത്താൽ മതി. മല്ലിയില അരിഞ്ഞതും മേലെ തൂകി വിളമ്പുന്ന പാത്രത്തിലേക്കു മാറ്റുക. 

• മാങ്ങ പുളി കൂടുതലുള്ളതാണെങ്കിൽ  അതനുസരിച്ചു ചേർത്താൽ മതിയാകും.
• വഴുതിനങ്ങ ചേർക്കാതെയും ഈ കറിയുണ്ടാക്കാം.

Pachamathan olan

ആവശ്യമുള്ള സാധനങ്ങൾ :

പച്ചമത്തൻ                               : 1/2 കിലോ 

പച്ചമുളക്                                  : 3 എണ്ണം 

തേങ്ങാപാൽ                            : 1/4 കപ്പ് 

ഉപ്പ് ആവശ്യത്തിന് 

കറിവേപ്പില                             : ഒരു തണ്ട് 

വെളിച്ചെണ്ണ                             : 1 ടേബിൾസ്പൂൺ

ചെയ്യുന്ന വിധം:

മത്തൻ  ചെറിയ ചതുരത്തിൽ ഘനമില്ലാതെ മുറിച്ചു വെക്കുക.

ഇതിൽ പച്ചമുളകു നീളത്തിൽ കീറിയതും ഉപ്പും അല്പം വെള്ളവും (വളരെ കുറച്ചു വെള്ളം മതി) ചേർത്തി വേവിക്കുക. മത്തൻ ഉടഞ്ഞു പോവരുത്  പക്ഷെ വെന്തിരിക്കണം.

ഇതിൽ തേങ്ങാപാൽ ചേർത്തി ഒന്ന് കൂടി വേവിക്കുക. മേലെ വെളിച്ചെണ്ണ ഒഴിച്ച് കറിവേപ്പിലയും ചേർത്തുക. 

ഓലൻ റെഡി!!

 

Prawn Biryani

ചെമ്മീൻ ബിരിയാണി 

ആവശ്യമുള്ള സാധനങ്ങൾ :

ബാസ്മതി  അരി                                  : 1  കപ്പ് 

ചെമ്മീൻ                                              : 10 -12 എണ്ണം 

ഇഞ്ചി വെളുത്തുള്ളി അരച്ചത്         : ഒരു ടീസ്പൂൺ 

മുളകുപൊടി                                      : 1/2 ടീസ്പൂൺ 

മല്ലിപ്പൊടി                                           : 1ടീസ്പൂൺ 

വലിയ ഉള്ളി                                        : 2  എണ്ണം 

തക്കാളി                                              : 1 എണ്ണം 

ഗരം മസാല പൊടി                            : 1/2 ടീസ്പൂൺ 

തൈര്                                                 : 1 ടേബിൾസ്പൂൺ 

ഉപ്പ്‌  ആവശ്യത്തിന് 

മല്ലിയില പുതിനയില അരിഞ്ഞത്   : 2 ടേബിൾസ്പൂൺ
നെയ്യ്                                                 : 2 ടേബിൾസ്പൂൺ
 എണ്ണ                                                 : 2 ടേബിൾസ്പൂൺ
പാല്                                                    : 2 ടേബിൾസ്പൂൺ
കുംകുമപ്പൂവ്‌                                      : ഒരു നുള്ള്


തിരുമ്മിവെക്കാൻ :

മുളകുപൊടി                                     : അര ടീസ്പൂൺ
മഞ്ഞപ്പൊടി                                      : ഒരു നുള്ള്
ഉപ്പ്‌  അല്പം
ഇഞ്ചി വെളുത്തുള്ളി പേസ്റ്റ്          : 1/2 ടീസ്പൂൺ
നാരങ്ങാനീര്                                    :1 ടീസ്പൂൺ

ചെയ്യുന്ന വിധം  :

തിരുമ്മിവെക്കാനുള്ള  എല്ലാം ഒന്നിച്ചു ചേർത്തി ചെമ്മീനിൽ നന്നായി കലർത്തി വെക്കുക.

അരി 20 മിനിട്ടു  വെള്ളത്തിലിട്ടു വെച്ച ശേഷം വെള്ളം വാലാൻ വെക്കുക.

ഒരു  നാലു കപ്പു വെള്ളം ചൂടാക്കുക, 

ഇതിൽ അല്പം ഉപ്പും ചേർത്തി വെട്ടിത്തിളക്കുമ്ബോൾ അരി ഇതിൽ ചേർത്തി ഏഴോ എട്ടോ മിനിട്ടു നന്നായി തിളച്ചാൽ (അരി മുക്കാൽ വേവായാൽ) അടുപ്പിൽ നിന്നും മാറ്റി വാർത്തു വെക്കുക.

ഉള്ളി ഘനമില്ലാതെ അരിഞ്ഞു വെക്കുക. പച്ചമുളക് രണ്ടായി കീറിവെക്കുക. തക്കാളി അരിഞ്ഞുവെക്കുക.

എണ്ണയും നെയ്യും കൂടി ഒരു പാനിൽ ചൂടാക്കുക.  തിരുമ്മിവെച്ച ചെമ്മീൻ നല്ല ചൂടിൽ 2 മിനിട്ടു നേരം വറുത്തെടുത്തു  എണ്ണയിൽ നിന്നും മാറ്റി വെക്കുക.

വറുത്ത എണ്ണയിൽ ഉള്ളിയിട്ടു വഴറ്റുക.  ബ്രൗൺ നിറം വന്നാൽ കീറിവെച്ച പച്ചമുളകും ചേർത്തുക. (അല്പം ഉള്ളിയെടുത്തു അലങ്കരിക്കാൻ മാറ്റിവെക്കുക.)

 വഴറ്റിയ ഉള്ളിയിൽ ഇഞ്ചി വെളുത്തുള്ളി അരച്ചതും ചേർത്തി ഒന്നുകൂടി വഴറ്റുക. തീ കുറച്ചു മുളകുപൊടിയും മല്ലിപ്പൊടിയും ചേർത്തുക. പച്ചമണം മാറിയാൽ തക്കാളി അരിഞ്ഞതും ചേർത്തി ഇളക്കുക. തക്കാളി ഉടഞ്ഞ പരുവമായാൽ അല്പം ഉപ്പും തൈരും കുറച്ചു മല്ലിയിലയും പുതിനയും അരിഞ്ഞതും ചേർത്തി നന്നായി ഇളക്കുക.  ഇതിൽ ചെമ്മീൻ വറുത്തതും ചേർത്ത്  2 മിനിട്ടു ഇളക്കുക. തീ കെടുത്തി വെക്കുക.

ഇളം ചൂടുള്ള പാലിൽ കുംകുമപ്പൂ ഇട്ടുവെക്കുക.

ഒരു പാത്രത്തിൽ ഈ ചെമ്മീൻ മസാല നിരത്തി  മേലെ വാർത്തു വെച്ച ചോറും നിരത്തി അതിനു മേലെ വറുത്തു വെച്ച ഉള്ളിയും മല്ലിയിലയും പുതിനയിലയും അരിഞ്ഞതും ചേർത്തി കുംകുമപ്പൂവിട്ടു വെച്ച പാൽ അൽപാപ്പമായി മേലെ തൂവുക.

അടുപ്പിൽ ഒരു പരന്ന പാനിൽ അല്പം വെള്ളം തിളപ്പിച്ച് അതിനു മേലെ ഈ പാത്രം വെച്ച് അമർത്തി അടച്ചുവെച്ചു  ഒരു പത്തുമിനിട്ടു വെക്കുക. പത്തുമിനിട്ടിനു ശേഷം തീ കെടുത്തുക. 

ഒരു ഫോർക്കു കൊണ്ട് മെല്ലെ ഇളക്കി നോക്കുക. പാകത്തിനു വെന്ത ബിരിയാണി റെഡി !!