Seva

സേവ

നൂൽപുട്ടു പിഴിഞ്ഞ് ചെറുതായി പൊട്ടിച്ച് കടുകും മുളകും മറ്റും വറുത്തിട്ടാൽ സേവയായി. സേവയിൽ തേങ്ങ ചേർക്കേണ്ട ആവശ്യമില്ല.

ആവശ്യമുള്ള സാധനങ്ങൾ :


അരിപ്പൊടി           : 2 കപ്പ്‌
ഉപ്പു് ആവശ്യത്തിന്
എണ്ണ                      : 3-4 ടേബിൾസ്പൂണ്‍
ഉഴുന്നുപരുപ്പ്     : 1 ടേബിൾസ്പൂണ്‍
ചുവന്ന മുളക്     : 2 എണ്ണം
കറിവേപ്പില        : 1 തണ്ട്


ചെയ്യുന്ന വിധം


 അരി വെള്ളത്തിലിട്ടു കുതിർത്തി നല്ലപോലെ,  അരച്ച് വെക്കുക. അരകല്ലു കഴുകിയ  വെള്ളം ഉപയോഗിച്ച് അല്പം വെള്ളത്തോടെ തന്നെ വേണം.   എന്നിട്ട്  ഒരു അടി കട്ടിയുള്ള പാത്രത്തിൽ  അല്പം എണ്ണയൊഴിച്ച് (ഒരു ടീസ്പൂണ്‍) അരിമാവ് ചേർത്തി  ചെറിയ തീയിൽ നല്ലപോലെ കിണ്ടി വെക്കണം.

അല്ലെങ്കിൽ മാർകറ്റിൽ തന്നെ ഇടിയപ്പം പൊടി വാങ്ങാൻ കിട്ടും. ഈ
അരിപ്പൊടിയിൽ ഉപ്പിട്ട്, തിളച്ച വെള്ളം കുറേശ്ശെ ഒഴിച്ചു് കട്ടിയായി കുഴച്ചു വെക്കുക. കൈയിൽ  എണ്ണ  പുരട്ടി ഒന്നുകൂടി കുഴക്കണം.

സേവനാഴിയെടുത്ത്   സേവയുടെ ചില്ലിട്ട്‌ മാവ് നിറച്ച് ഒരു ഇഡ്ഡലി തട്ടിലേക്കു സേവ പിഴിഞ്ഞ ശേഷം ഇഡ്ഡലി പാത്രത്തിൽ വേവിക്കുക.
മാവ് മുഴുവൻ ഇതുപോലെ ചെയ്യണം.
ഒരു ചീനച്ചട്ടി എണ്ണയൊഴിച്ചു ചൂടാക്കിയ ശേഷം കടുകിട്ട് പൊട്ടിയതിൽ പിന്നെ ഉഴുന്നു പരുപ്പും മുളകു പൊട്ടിച്ചതും ഇട്ടിളക്കി കറിവേപ്പില ചേർത്തുക. എന്നിട്ട് പിഴിഞ്ഞു വെച്ച സേവ പൊട്ടിച്ചതും  ഇട്ടിളക്കുക.  തീ കെടുത്തി വിളമ്പുന്ന പത്രത്തിലേക്ക് മാറ്റുക.

 പഞ്ചസാര ചേർത്തോ  ചട്ണി ചേർത്തോ കഴിക്കാം.

Egg curry (Mutta curry)

മുട്ട കറി 

ആവശ്യമുള്ള സാധനങ്ങൾ

മുട്ട                               : 4 എണ്ണം 

മുളകുപൊടി           :1 ടീസ്പൂണ്‍ 

മല്ലിപ്പൊടി                 :2 ടീസ്പൂണ്‍ 

മഞ്ഞപ്പൊടി              :1/4 ടീസ്പൂണ്‍ 

ചെറിയ ഉള്ളി          :5-6 

ഇഞ്ചി                          :1/2" കഷ്ണം 

വെളുത്തുള്ളി          :2 അല്ലി 

തേങ്ങ ചിരവിയത് : 1/2 കപ്പ്‌ 

പുളി പേസ്റ്റ്               : കുറച്ച്

ഉപ്പു് ആവശ്യത്തിന്

കറിവേപ്പില             : ഒരു തണ്ട് 

മല്ലിയില അരിഞ്ഞത് :അല്പം 

ചെയ്യുന്ന വിധം

മുട്ട തിളച്ച വെള്ളത്തിലിട്ടു വേവിക്കുക. തോലു കളഞ്ഞ് മാറ്റിവെക്കുക.

ഒരു പാൻ എണ്ണയില്ലാതെ ചൂടാക്കുക. തീ കുറച്ച ശേഷം മുളകുപൊടിയും മല്ലിപ്പൊടിയും ഇട്ട് പച്ചമണം മാറിയതും തീ കെടുത്തുക. ഇതിൽ ഉള്ളിയും വെളുത്തുള്ളിയും ഇഞ്ചിയും ഇട്ട് മിക്സിയിൽ അരക്കുക.

തേങ്ങ  ചിരവിയത് മിക്സിയിൽ വേറെ അരച്ചു വെക്കുക.

ഒരു പാത്രത്തിൽ അരച്ച മസാലയും പുളിയുടെ പേസ്റ്റും ഉപ്പും രണ്ടു കപ്പു വെള്ളവും ചേർത്തി രണ്ടോ മൂന്നോ മിനിട്ടു തിളപ്പിക്കുക. ഇതിൽ അരച്ചുവെച്ച തേങ്ങ ചേർത്ത് ഒന്നുകൂടി തിളപ്പിക്കുക. തീ കുറച്ച്, വേവിച്ച മുട്ട രണ്ടായി മുറിച്ച്‌ ഇതിൽ ചേർത്തി ഒന്നു കൂടി തിളപ്പിച്ച ശേഷം  കറിവേപ്പില ചേർത്തി   വാങ്ങിവെക്കുക.

വിളമ്പുന്ന പാത്രത്തിലേക്കു മാറ്റി മല്ലിയില കൊണ്ടലങ്കരിക്കുക. ചോറിനും ചപ്പാത്തിക്കും ഈ കറി നന്നായിരിക്കും.

Gothambu dosa

ഗോതമ്പു ദോശ 

ഗോതമ്പു ദോശ പൊതുവേ വീട്ടിൽ ഇഡ്ഡലി മാവു കഴിയുമ്പോൾ പെട്ടെന്നുണ്ടാക്കുന്ന ഒരു വിഭവമാണ്. ഗോതമ്പു മാവു് (ചപ്പാത്തിക്കു പൊടിച്ചത്) തനിച്ചുണ്ടാക്കന്നതിനേക്കാൾ അല്പം അരിപ്പൊടി അല്ലെങ്കിൽ പഴയ ഇഡ്ഡലിമാവ് ബാക്കി വന്നതും കലർത്തി ഉണ്ടാക്കിയാൽ അല്പം കൂടി രുചി ഉണ്ടായിരിക്കും. 

അതുതന്നെ കുറച്ചു കടുകും ഉള്ളി അരിഞ്ഞതും പച്ചമുളക് അരിഞ്ഞതും ചേർത്തിയാൽ ഒന്നുകൂടി നന്നായിരിക്കും.

ഞാൻ അല്പം ഇഡ്ഡലി മാവ് ചേർത്തിയാണ് ഇവിടെ ഉണ്ടാക്കിയത്.

ആവശ്യമുള്ള സാധനങ്ങൾ 

ഇഡ്ഡലി മാവ്      :  1 കപ്പ്‌ 

ഗോതമ്പു മാവ്  : 2 കപ്പ്‌ 

ഉപ്പു് വളരെ കുറച്ച്‌ 

എണ്ണ                       : 2 ടേബിൾസ്പൂണ്‍ 

ചെയ്യുന്ന വിധം

ഗോതമ്പ് മാവും ഇഡ്ഡലിമാവും അല്പം ഉപ്പും ( ഇഡ്ഡലിമാവിൽ ഉപ്പുള്ളത് കൊണ്ട് ചേർത്തില്ലെങ്കിലും കുഴപ്പമില്ല) ചേർത്തി നന്നായി കലക്കി വെക്കുക.ഇഡ്ഡലി മാവില്ലെങ്കിൽ അര കപ്പ്‌ അരിപ്പൊടി ചേർത്തുക, ഇതിൽ ഉപ്പിടണം.

ഒരു ദോശക്കല്ലു  ചൂടാക്കി ഒരു കയിൽ നിറയെ മാവെടുത്ത്‌ വട്ടത്തിൽ പരത്തുക.

 അല്പം എണ്ണ തൂവിക്കൊടുക്കുക. ഒരു ഭാഗം വെന്തു വന്നാൽ തിരിച്ചിടുക. 

ഒന്ന് കൂടി മൊരിഞ്ഞ ശേഷം അടുപ്പിൽ നിന്നും എടുത്തു മാറ്റി വിളമ്പുന്ന കിണ്ണത്തിലേക്കിടുക.

 ബാക്കി മാവും ഇതുപോലെ ചെയ്യുക. നല്ല ഉള്ളി ചമ്മന്തിയോ(ulli chammanthi) ചട്ണിയോ(Chutney) കൂട്ടി ചൂടോടെ കഴിക്കാം.

ഇതേ മാവിൽ അല്പം കടുകു വറുത്തു ഉള്ളിയും പച്ചമുളകും അരിഞ്ഞതിട്ടു മൂപ്പിച്ചു മാവിൽ ചേർത്തി നന്നായി കലക്കി ഇതുപോലെ തന്നെ ചുട്ടാൽ കുറച്ചു കൂടി രുചിയുണ്ടാവും. ചൂടോടെ തന്നെ കഴിക്കുന്നതാണ് രുചി.

Maladu/pottukkadala urunda

മാലാഡു

മാലാഡു  അഥവാ പൊട്ടുക്കടല ഉരുണ്ട ഉണ്ടാക്കാൻ വളരെ എളുപ്പമാണ്. പാവു കാച്ചുന്ന പണിയൊന്നും ഇല്ല. തിന്നാൻ സ്വാദും ഉണ്ടാവും. ഏകദേശം ബേസൻ ലഡ്ഡു (കടലമാവു കൊണ്ടുണ്ടാക്കുന്ന ഒരു ലഡ്ഡു) പോലെയുണ്ടാവും.

ആവശ്യമുള്ള സാധനങ്ങൾ

പൊട്ടുക്കടല                     : 1കപ്പ്‌
പഞ്ചസാര                          : 1 കപ്പ്‌
എലക്കപ്പൊടി                  : 1/4 ടീസ്പൂണ്‍
നെയ്യ്                                    : 1 കപ്പ്‌
വറുത്ത അണ്ടിപരുപ്പ്  : 5-6

ചെയ്യുന്ന വിധം

പൊട്ടുക്കടലയും പഞ്ചസാരയും കൂടി പൊടിക്കുക.
കട്ടകളുണ്ടെന്നു തോന്നുന്നെങ്കിൽ ഒന്നു ചലിച്ചെടുക്കാം. ഇതിൽ എലക്കപ്പൊടിയും വറുത്ത അണ്ടിപരുപ്പും കലർത്തി ഒരു പരന്ന പാത്രത്തിലോ കിണ്ണത്തിലോ വെക്കുക.

 നെയ്യ് ഒന്നു ചൂടാക്കി കുറച്ചു പൊടിയിൽ കുറേശ്ശെ നെയ്യൊഴിച്ച് ഉരുണ്ട പിടിക്കുക. നെയ്യ് പാകത്തിനൊഴിക്കണം, കുറഞ്ഞാൽ പെട്ടെന്നു പൊടിഞ്ഞു പോകും, കൂടിപ്പോയാലും നന്നായിരിക്കില്ല. ബാക്കി പൊടിയും ഇതുപോലെ ലഡ്ഡു ഉണ്ടാക്കി വെക്കുക. ആറിയ ശേഷം ഒരു ടിന്നിൽ സൂക്ഷിക്കാം.

Potato Masala curry

ഉരുളകിഴങ്ങു മസാലകറി 

ആവശ്യമുള്ള സാധനങ്ങൾ :

ഉരുളകിഴങ്ങ്          :2എണ്ണം 

തക്കാളി                     :1 വലുത് 

വലിയ ഉള്ളി           : 1 

ഇഞ്ചി                         : 1/2" കഷ്ണം 

വെളുത്തുള്ളി         : 2 അല്ലി 

മുളകുപൊടി           : 1ടീസ്പൂണ്‍ 

മല്ലിപ്പൊടി                : 2ടീസ്പൂണ്‍ 

മഞ്ഞപ്പൊടി             : 1/4 ടീസ്പൂണ്‍ 

ചെറിയ ഉള്ളി         : 5 എണ്ണം 

തേങ്ങ ചിരവിയത് : 1 കപ്പ്‌

മല്ലിയില                    :ഒരു തണ്ട്

വറുത്തിടാൻ

കടുക്                          : 1ടീസ്പൂണ്‍

മുളക്                           : 1
കറിവേപ്പില             : 1 തണ്ട്
ചെറിയ ഉള്ളി          : 4 എണ്ണം
എണ്ണ                            : 1ടേബിൾസ്പൂണ്‍

ചെയ്യുന്ന വിധം

ഒരു പാൻ ചൂടാക്കിചെറിയ തീയിൽ മുളകുപൊടിയും മല്ലിപ്പൊടിയും ഇട്ട് ചെറുതായി ഒന്നു പച്ചമണം പോവുന്ന വരെ വറുക്കുക(എണ്ണ യില്ലാതെ).
ഇതിൽ ഇഞ്ചിയും വെളുത്തുള്ളിയും ചെറിയ ഉള്ളിയും ചേർത്തി മിക്സിയിൽ നന്നായി അരച്ചുവെക്കുക.
തേങ്ങ വേറെ അരച്ചുവെക്കണം.
ഉരുളകിഴങ്ങും ഉള്ളിയും തക്കാളിയും എല്ലാം ചെറിയ ചതുരകഷണങ്ങളാക്കി മുറിച്ചുവെക്കുക.

ഒരു പ്രഷർകുക്കറിൽ അരിഞ്ഞു വെച്ച കഷ്ണങ്ങളും ഉപ്പും മഞ്ഞപ്പൊടിയും അരച്ച മസാലയും ചേർത്തി അരകപ്പ്‌ വെള്ളവും ഒഴിച്ചു പത്രം മൂടി വേവിക്കുക.ഒരു വിസിൽ വന്നാൽ സ്റ്റവ് കെടുത്തി വാങ്ങിവെക്കുക.  ഒരു വിസിൽ മതിയാവും അല്ലെങ്കിൽ കഷ്ണങ്ങൾ ഉടഞ്ഞു പോകും.
തണുത്ത ശേഷം പാത്രം തുറന്ന് ഇളക്കിവീണ്ടും അടുപ്പത്തു വെച്ച് അരച്ച തേങ്ങ ഒഴിച്ച് ഇളക്കി ഒന്നു കൂടി തിളപ്പിക്കുക. വെള്ളം പാകത്തിനേ ഒഴിക്കാവൂ കാരണം ഇത് ഒരു കുറുകിയ കറിയാണ്.
ഇനി ഒരു ചീന ചട്ടിയിൽ എണ്ണ ചൂടാക്കി കടുകിട്ട് പോട്ടുമ്പോൾ മുളകു പൊട്ടിച്ചതും ഉള്ളി ചെറുതായി അരിഞ്ഞതും ഇട്ട് മൂപ്പിച്ച്‌ കറിയിൽ ഒഴിക്കുക.
കറിവേപ്പില ഇടുക.

വിളമ്പുന്ന പാത്രത്തിലേക്കു മാറ്റി മല്ലിയില അരിഞ്ഞതു മേലെ തൂവുക.
ചോറിനും ചപ്പാത്തിക്കും പൂട്ടിനും എല്ലാം ചേരുന്ന ഒരു കറിയാണിത്!
വെളുത്തുള്ളി വേണ്ടെങ്കിൽ ഒഴിവാക്കാവുന്നതാണ്.

Vegetable uthappam

പച്ചക്കറി ഊത്തപ്പം

ആവശ്യമുള്ള സാധനങ്ങൾ

ഇഡ്ഡലി മാവ്                 : 3 കപ്പ്‌

ഉള്ളി അരിഞ്ഞത്         : 2 ടേബിൾസ്പൂണ്‍

കാരറ്റ് ചിരവിയത്       : 2ടേബിൾസ്പൂണ്‍ 

കുടമുളക് അരിഞ്ഞത്  : 1ടേബിൾസ്പൂണ്‍ 

മുട്ടക്കോസ് അരിഞ്ഞത് : 1ടേബിൾസ്പൂണ്‍ 

പച്ചമുളക് അരിഞ്ഞത്  : 1 

തക്കാളി അരിഞ്ഞത്     : 1 

മല്ലിയില അരിഞ്ഞത്   : 1 ടീസ്പൂണ്‍

എണ്ണ                          : 2 ടേബിൾസ്പൂണ്‍

ചെയ്യുന്ന വിധം 

പച്ചക്കറികളെല്ലാം മുറിച്ചു തയാറാക്കി വെക്കുക.

ഒരു പാൻ ചൂടാക്കി അല്പം എണ്ണയൊഴിച്ച് പച്ചക്കറി അരിഞ്ഞതെല്ലം ഇട്ട് ഒന്ന് ചെറുതായി വതക്കുക.

ഒരു ദോശക്കല്ലു ചൂടാക്കി, ഒരു കയിൽ മാവെടുത്ത്‌ അല്പം വട്ടത്തിൽ പരത്തുക. വതക്കി  വെച്ച പച്ചക്കറികൾ  കുറേശ്ശെ എടുത്തു മേലെതൂവുക.

അല്പം(വളരെ കുറച്ച് ) എണ്ണ ചുറ്റും ഒഴിക്കുക. നന്നായി വെന്താൽ തിരിച്ചിടുക. 

രണ്ടു ഭാഗവും ആയാൽ വാങ്ങി വെച്ച് ബാക്കി മാവും ഇതുപോലെ ചെയ്യുക. ചൂടോടെ ചട്ണി കൂട്ടി കഴിക്കുക.

Thenga chutney

തേങ്ങ ചട്ണി

തേങ്ങ അഥവാ നാളികേര ചട്ണി മിക്കവാറും എല്ലാ പലഹാരങ്ങളുടെയും  കൂടെ കഴിക്കാൻ പറ്റിയതാണ്. ഇഡ്ഡലി, ദോശ, വട, പൊങ്കൽ, ഊത്തപ്പം, ഇടിയപ്പം, ആപ്പം എന്നിങ്ങനെ എല്ലാറ്റിനും ചേരുന്ന ഒരു വിഭവമാണ്.

ആവശ്യമുള്ള സാധനങ്ങൾ

തേങ്ങ ചിരവിയത്          : 1 കപ്പ്‌
പച്ചമുളക്                           : 3 എണ്ണം
പൊട്ടുക്കടല                       : 1 ടേബിൾസ്പൂണ്‍
ഇഞ്ചി                                    : ഒരു ചെറിയ കഷ്ണം
കടുക്                                     : 1/2 ടീസ്പൂണ്‍
ഉഴുന്നുപരുപ്പ്                    : 1/4 ടീസ്പൂണ്‍
എണ്ണ                                       : 1 ടീസ്പൂണ്‍
ചുവന്ന മുളക്                    : 1 രണ്ടായി പൊട്ടിച്ചത്
ഉപ്പു്  ആവശ്യത്തിന്
കറിവേപ്പില                       : ഒരു തണ്ട്

ചെയ്യുന്ന വിധം

തേങ്ങയും പച്ചമുളകും ഇഞ്ചിയും പൊട്ടുക്കടലയും ഉപ്പും ചേർത്തു മിക്സിയിൽ അല്പം വെള്ളം ചേർത്ത് നന്നായരക്കുക.

പച്ചമുളക് എരിവനുസരിച്ച്‌ കൂട്ടുകയോ കുറയ്ക്കുകയോ ചെയ്യാം.
ഒരു ചീനച്ചട്ടിയിൽ  എണ്ണയൊഴിച്ച്  ചൂടാകുമ്പോൾ കടുകിട്ടു പൊട്ടുമ്പോൾ ഉഴുന്നുപരുപ്പും മുളകു പൊട്ടിച്ചതും ഇടുക. ഉഴുന്ന് പരുപ്പ് നിറം മാറിയാൽ കറിവേപ്പിലയിട്ടു അരച്ചുവെച്ച ചട്ണിയിലേക്ക് ഒഴിക്കുക. വെള്ളം പോരെങ്കിൽ അല്പം ഒഴിക്കാം. ഇടത്തരം അയവോടെയുണ്ടാവണം.

ഇതുതന്നെ വെള്ളമില്ലാതെ അരച്ച് കട്ടിയായി ഉപയോഗിക്കാം, അതിൽ കടുകു വറുത്തിടണ്ട ആവശ്യമില്ല.  ബജ്ജിക്കും മറ്റും അത്തരം ചട്ണിയാണ് പതിവ്.
 

Madhura seva

മധുര സേവ

മധുര സേവ ഒരു നാലുമണി പലഹാരമാണ്. ഉണ്ടാക്കാൻ എളുപ്പവുമാണ്.

ആവശ്യമുള്ള സാധനങ്ങൾ

കടലമാവ്          : 1/2 കപ്പ്‌ 

അരിപ്പൊടി       : 1/2 കപ്പ്‌ 

 പഞ്ചസാര         : 1/2 കപ്പ്‌

എണ്ണ  വറുക്കാൻ ആവശ്യത്തിന് 

ചെയ്യുന്ന വിധം

കടലമാവും അരിപ്പൊടിയും അല്പം വെള്ളം ചേർത്തി നൂൽപുട്ടിനു (ഇടിയപ്പം)കുഴക്കുന്നതുപോലെ അല്പം കട്ടിയായി കുഴക്കുക.

എണ്ണ ചീനച്ചട്ടിയിൽ ചൂടാവാൻ വെക്കുക.  സേവനാഴിയിൽ സേവക്കു ഉപയോഗിക്കുന്ന ചില്ലിനേക്കാൾ വലിയ തുളയുള്ള ചില്ലുണ്ട്. അതുപയോഗിച്ചു സേവ പിഴിയുന്നത് പോലെ ചൂടായ എണ്ണയിലേക്കു പിഴിയുക.  ഇളം ബ്രൌണ്‍ നിറം വന്നാൽ വറുത്തു കോരുക.

കുറേശ്ശെയായി, പല പ്രാവശ്യമായി   ഇങ്ങിനെ മാവു മുഴുവൻ വറുത്തു വെക്കണം.

ഒരു പാനിൽ പഞ്ചസാരയും അല്പം വെള്ളവും (വളരെ കുറച്ചു മതി) ചൂടാക്കാൻ വെക്കുക. പഞ്ചസാര ഉരുകി നൂൽ പരുവമാകുമ്പോൾ ഇറക്കി വെച്ച് വറുത്തു വെച്ച മധുരസേവ പൊട്ടിച്ചിട്ട് ഇളക്കുക. പാവ് എല്ലായിടത്തും ഒരുപോലെ പിടിക്കണം. ഒട്ടലുണ്ടെങ്കിൽ അല്പം പഞ്ചസാര തൂവുക.

നന്നായി ആറിയാൽ വായു കടക്കാത്ത ടിന്നിൽ സൂക്ഷിച്ചു വെക്കാവുന്നതാണ്.

Seven cups cake

സെവൻ കപ്പ്‌ കേക്ക്

പേരു പോലെ തന്നെ ഏഴു കപ്പ്‌ സാധനങ്ങൾ കൊണ്ടാണിതുണ്ടാക്കുന്നത്.
ഉണ്ടാക്കുവാൻ വളരെ എളുപ്പവുമാണ്. കഴിക്കാനും നല്ല സ്വാദുണ്ടാവും.

ആവശ്യമുള്ള സാധനങ്ങൾ 

കടലമാവ്                    : 1 കപ്പ്‌
നെയ്യ്                              : 1 കപ്പ്‌
പഞ്ചസാര                   : 3 കപ്പ്‌
തേങ്ങ ചിരവിയത്  : 1 കപ്പ്‌
പാൽ                              : 1 കപ്പ്‌



ചെയ്യുന്ന വിധം

ഒരു  പരന്ന കിണ്ണത്തിൽ അല്ലെങ്കിൽ ട്രേയിൽ   നെയ്യു  തടവി വെക്കുക
ഒരു പാൻ  ചൂടാക്കി കടലമാവിട്ട് ഇളക്കി വറുത്ത മണം വരുന്നതു  വരെ വറുക്കുക.

തീയിൽ  നിന്നും മാറ്റി തേങ്ങ ചിരവിയതും പഞ്ചസാരയും പാലും ചേർത്തി  ഇളക്കുക, എന്നിട്ട് നെയ്യൊഴിക്കുക.

 വീണ്ടും അടുപ്പിൽ വെച്ച് നന്നായി ഇളക്കിക്കൊണ്ടിരിക്കുക. പതഞ്ഞു വരാൻ തുടങ്ങി പാത്രത്തിൽ നിന്നും ഒട്ടാതെ വരുന്ന പരുവത്തിൽ നെയ്യു തടവിയ ട്രേയിലേക്കു   ഒഴിക്കുക.

ഒരു പരന്ന സ്പൂണ്‍ കൊണ്ട് ഒപ്പം നിരത്തുക.
കുറച്ചു സമയം തണുക്കാൻ അനുവദിക്കുക. എന്നിട്ട് ചതുരത്തിൽ മുറിക്കുക.
നന്നായി തണുത്ത ശേഷം വായു കടക്കാത്ത ടിന്നിൽ സൂക്ഷിച്ചു വെക്കാം. 

Chicken curry (kozhi curry)

കോഴി കറി

കോഴി കഷ്ണങ്ങൾ    : 1/2 കിലോ
വലിയ ഉള്ളി                 : 2എണ്ണം
ചെറിയ ഉള്ളി               : 10 എണ്ണം
വെളുത്തുള്ളി               : 3 എണ്ണം
ഇഞ്ചി                               : ഒരിഞ്ചു കഷ്ണം
കുരുമുളക്                     : 1ടീസ്പൂണ്‍
മുളകുപൊടി                 : 1 ടേബിൾസ്പൂണ്‍
മല്ലിപ്പൊടി                      : 2 ടേബിൾസ്പൂണ്‍
മഞ്ഞപ്പൊടി                   : 1/2 ടീസ്പൂണ്‍
തക്കാളി                            : 2 എണ്ണം
തേങ്ങാപാൽ                  : 1/2 കപ്പ്‌
ഉപ്പു് ആവശ്യത്തിന്
എണ്ണ                                 :3 ടേബിൾസ്പൂണ്‍

ചെയ്യുന്ന വിധം

ഉള്ളി ഘനമില്ലാതെ നീളത്തിൽ അരിഞ്ഞു വെക്കുക.
ഒരു ചീനച്ചട്ടിയിൽ കുരുമുളകിട്ടു പൊട്ടുമ്പോൾ തീ കുറച്ചു മുളകുപൊടിയും മല്ലിപൊടിയും ഇടുക. പച്ചമണം മാറുമ്പോൾ തീ കെടുത്തി ചെറിയ ഉള്ളിയും ഇഞ്ചിയും വെളുത്തുള്ളിയും  ഇട്ടു നന്നായരക്കുക.

കോഴി കഷ്ണങ്ങൾ നന്നായി കഴുകി ഉപ്പും മഞ്ഞപ്പൊടിയും ഒരു ടേബിൾസ്പൂണ്‍ അരച്ച മസാലയും ചേർത്തി വേവിക്കുക.

ഒരു നോണ്‍സ്റ്റിക് പാനിൽ രണ്ടു ടേബിൾ സ്പൂണ്‍ എണ്ണയൊഴിച്ച് ചൂടാവുമ്പോൾ   ഉള്ളി അരിഞ്ഞതിട്ടു വഴറ്റുക. നന്നായി വഴറ്റിയ ശേഷം അരച്ചുവെച്ച ബാക്കി മസാലയും ഇതിലിട്ട് വഴറ്റി (എണ്ണപോരെങ്കിൽ കുറച്ചുകൂടി ചേർക്കാം) തക്കാളി അരിഞ്ഞിടുക.

 തക്കാളി കുഴഞ്ഞ പരുവമായാൽ വെന്ത കോഴി വെള്ളത്തോടെ ഇതിലേക്ക് ഒഴിക്കുക. ചെറിയ തീയിൽ വെള്ളം കുറച്ചു വറ്റി മസാല കുറുകി വരുമ്പോൾതേങ്ങാപാൽ ചേർത്തി ഇളക്കി ഒരു മിനിട്ട് കഴിഞ്ഞ ശേഷം വാങ്ങിവെക്കുക. മല്ലിയില തൂവി വിളമ്പാം. നൂൽപുട്ടിനും, ദോശക്കും, ആപ്പത്തിനും എല്ലാം പറ്റിയ കറിയാണിത്.

Ari pathiri

അരി പത്തിരി

പത്തിരി കേരളത്തിലെ,  പ്രത്യേകിച്ച് മുസ്ലിം വീടുകളിലെ ഒരു വിഭവമാണ്. പത്തിരി കോഴിക്കറി കൂട്ടിയാണ് പൊതുവേ കഴിക്കാറുള്ളത്.

ആവശ്യമുള്ള സാധനങ്ങൾ

  
അരിപ്പൊടി                     : 1 കപ്പ്‌
ഉപ്പു്   ആവശ്യത്തിന്
എണ്ണ                                   : 1 ടീസ്പൂണ്‍
വെള്ളം (ഏകദേശം ഒരു കപ്പ്‌ )

ചെയ്യുന്ന വിധം

അരിപ്പൊടി മാർക്കറ്റിൽ നിന്നു വാങ്ങാൻ കിട്ടും. നിറപറ, ഡബിൾ ഹോർസ്  എന്നീ ബ്രാൻഡുകൾ കിട്ടും.
ഒരു ചീനചട്ടിയിൽ വെള്ളം ഒരു സ്പൂണ്‍ എണ്ണയും ഉപ്പും  ചേർത്തി തിളപ്പിക്കുക.
തീ കുറച്ച്‌ ഇതിൽ അരിപ്പൊടി കുറേശ്ശെയായി ഇട്ട് ഇളക്കികൊണ്ടിരിക്കണം.

അടിയിൽ പിടിക്കാതെ ശ്രദ്ധിക്കണം. വെള്ളം വറ്റി മാവ് കട്ടിയായാൽ തീ കെടുത്തി സ്പൂണ്‍ കൊണ്ട് നന്നായി ഇളക്കി അല്പം വെളിച്ചെണ്ണ കൈയിൽ തടവി നന്നായി കുഴക്കണം. നല്ല മൃദുവായ്രിക്കണം.
ഇതിൽ നിന്ന് കുറേശ്ശെ എടുത്തു ചെറിയ ഉരുളകളാക്കണം.

ഓരോ ഉരുളയും എടുത്ത്‌ പൂരിക്കല്ലിൽ മാവു തൂവി വട്ടത്തിൽ പരത്തിയെടുക്കുക.

ഒരു ദോശക്കല്ലു ചൂടാക്കി  പത്തിരി തിരിച്ചും മറിച്ചും ഇട്ടു ചുട്ടെടുക്കുക. ബ്രൌണ്‍ നിറം ആവും മുമ്പേ ദോശക്കല്ലിൽ നിന്ന് മാറ്റണം.അടുത്ത പത്തിരി ഇടും മുമ്പേ ദോശക്കല്ല് നന്നായി തുടക്കണം.

നല്ല കോഴിക്കറിയോ മട്ടണ്‍കറിയോ കൂട്ടി കഴിക്കാം.

Chakka pradhaman

ചക്ക പ്രഥമൻ

ചക്ക പ്രഥമൻ ചക്കച്ചുള കൊണ്ടും ചക്ക വരട്ടിയതു കൊണ്ടും  ഉണ്ടാക്കാവുന്നതാണ്. ചക്കയുടെ കാലം കഴിയുമ്പോൾ വരട്ടിവെച്ച ചക്ക കൊണ്ടുണ്ടാക്കാം.  ചക്ക ഒന്നിച്ചു പഴുക്കുമ്പോൾ വരട്ടി വെച്ചാൽ ഒരു കൊല്ലത്തോളം കേടുകൂടാതെയിരിക്കും. ഈ വരട്ടിവെച്ച ചക്ക കൊണ്ട് പായസം, അട എന്നിവ ഉണ്ടാക്കാം.

ആവശ്യമുള്ള  സാധനങ്ങൾ

ചക്കച്ചുള          : 20-30
വെല്ലം                : 1/2 കിലോ
നെയ്യ്                  : 1/2 കപ്പ്‌
തേങ്ങാപാൽ     }
ഒന്നാം പാൽ      } 1 കപ്പ്‌    
രണ്ടാംപാൽ      }2 കപ്പ്‌                           
തേങ്ങാകൊത്ത്‌ : 2 ടേബിൾസ്പൂണ്‍
ചുക്കുപ്പൊടി     : 1/4 ടീസ്പൂണ്‍
ഏലക്കാപ്പൊടി : 1/4 ടീസ്പൂണ്‍

ചെയ്യുന്ന വിധം

ചക്കച്ചുള പ്രഷർ കുക്കറിൽ അല്പം വെള്ളം ഒഴിച്ചു വേവിക്കുക. ആറിയ ശേഷം ഒരു കയിൽ കൊണ്ടു നന്നായി ഉടക്കുക. മിക്സിയിൽ ഒന്നടിച്ചാലും മതി.
വെല്ലം ഒരു ഉരുളിയിൽ അല്പം വെള്ളം ചേർത്ത് ഉരുക്കുക. ഉരുക്കിയ വെല്ലം അരിച്ചെടുക്കണം, അല്ലെങ്കിൽ കല്ലോ പൊടിയോ ഉണ്ടാവും.
അരിച്ചുവെച്ച വെല്ലത്തിൽ ഉടച്ചുവെച്ച ചക്ക ചേർത്തി നന്നായി യോജിപ്പിക്കുക. ഇനി വീണ്ടും അടുപ്പത്തു വെച്ച് നന്നായി തിളപ്പിക്കണം. കുറുകി വരുമ്പോൾ നെയ്യ് ചേർത്തി നന്നായി ഇളക്കണം. ഉരുളിയിൽ ഒട്ടാത്ത പരുവത്തിൽ അടുപ്പിൽ നിന്നും മാറിയാൽ ചക്ക വരട്ടിയതു തയാറായി.

തേങ്ങാപാൽ 
രണ്ടു തേങ്ങയിൽ ഉടച്ചു ചിരകി അല്പം ചെറുചൂടു വെള്ളം ഒഴിച്ച് പിഴിഞ്ഞെടുത്താൽ ഒന്നാം പാലായി.  അതേ തേങ്ങ ഒരു കപ്പ്‌ വെള്ളം ചേർത്തി ഒന്നു മിക്സിയിൽ അടിച്ച് അരിച്ചെടുത്താൽ രണ്ടാം പാലും റെഡി!
ഇല്ലെങ്കിൽ തേങ്ങാപാൽ ടിന്നിൽ വാങ്ങാൻ കിട്ടും. 400മില്ലി ടിന്നു വാങ്ങി പകുതി എടുത്ത് വെള്ളം ചേർത്തിയാൽ രണ്ടാം പാലും ബാക്കി ഒന്നാം പാലും ആയി ഉപയോഗിക്കാം.
ഇതുമല്ലെങ്കിൽ പൊടിയായും (coconut milk powder) വാങ്ങാൻ കിട്ടും.25 ഗ്രാം പൊടിയിൽ 100 മില്ലി ചെരുചൂടുവെള്ളം ചേർത്താൽ ഒന്നാം പാലായി. 200 മില്ലി വെള്ളം ചേർത്താൽ രണ്ടാം പാലായി.
പക്ഷെ തേങ്ങയിൽ നിന്നും ചിരകി അപ്പൊതന്നെ പാലെടുത്ത് ഉപയോഗിക്കുന്നതു പോലെ സ്വാദ് മറ്റൊന്നിനും വരില്ല.

വരട്ടി വെച്ച ചക്ക ഉപയോഗിച്ചു പായസം വെക്കുമ്പോൾ അല്പം കൂടി മധുരം വേണ്ടി വന്നേക്കും. അതുകൊണ്ട് ഒരു കാൽ കിലോ വെല്ലം കൂടി (മധുരം കുറവ് മതി എന്നുള്ളവർ  അതനുസരിച്ച് ചേർത്താൽ മതി) ചേർക്കണം.

  ഒരു ഉരുളിയിൽ അല്ലെങ്കിൽ അടി കട്ടിയുള്ള ഏതെങ്കിലും പരന്ന പാത്രത്തിൽ വെല്ലം   ഇട്ടു [അല്പം വെള്ളം ചേർത്ത് വെല്ലം ഉരുകുമ്പോൾ അരിച്ചെടുത്ത് വീണ്ടും ഉരുളിയിലേക്ക് ഒഴിച്ച്, ചക്ക വരട്ടിയതും ചേർത്തി നന്നായി ഇളക്കി അടുപ്പിൽ വെച്ച് തിളപ്പിക്കുക. ചില ചക്കകളിൽ നാരുണ്ടാവും. കലക്കുമ്പോൾ തടയുകയാണെങ്കിൽ എടുത്തു മാറ്റണം, അല്ലെങ്കിൽ പായസത്തിൽ നാരു പോലെ കിടക്കും.
നന്നായി തിളക്കുമ്പോൾ രണ്ടാം പാൽ  ചേർക്കുക.

 എന്നിട്ടു കുറച്ചു കൂടി തിളച്ച ശേഷം (കൊഴുപ്പ് കൂടുതലായാൽ അല്പം പാൽ ചേർക്കാം) വല്ലാതെ വെള്ളം കൂടിയാൽ ഒരു സ്പൂണ്‍ അരിപ്പൊടി അല്പം പാലിൽ കലർത്തി ചേർക്കാം. ഒരു ഇടത്തരം അയവാണ് നല്ലത്. ആറുമ്പോൾ ഒന്നുകൂടി കൊഴുക്കും.

ഇനി അവസാനമായി ഒന്നാം പാൽ ചേർക്കുക. ചേർത്തിയാൽ തിളക്കാനനുവദിക്കരുത്, അതിനു മുമ്പേ വാങ്ങി വെക്കാം.
ഇനി അല്പം നെയ്യിൽ തേങ്ങ അരിഞ്ഞുവെച്ചതിട്ടു ബ്രൌണ്‍ നിറത്തിൽ  വറക്കുക. ഇത് നെയ്യോടുകൂടി പായസത്തിലേക്ക് ഒഴിക്കുക. ഒന്നാറിയാൽ കഴിക്കാൻ നല്ല സ്വാദുണ്ടാവും.
ചക്ക വരട്ടിവെച്ചതുണ്ടെങ്കിൽ പെട്ടെന്നുണ്ടാക്കാം!!

Mysore pak

മൈസൂർ പാക്‌

മൈസൂർ പാക്‌ കല്യാണത്തിനും മറ്റും തലേന്നു തന്നെ വെപ്പുകാർ വീട്ടിൽ വന്നു ചെയ്തു കണ്ട പരിചയമുണ്ടെങ്കിലും സ്വന്തമായി ചെയ്യാൻ പറ്റും എന്നു തോന്നിയിരുന്നില്ല. എന്നാലും ഒന്നു ശ്രമിച്ചു നോക്കിയപ്പോൾ ബർഫി പോലെ യാണ് തോന്നിയത്. തൽകാലം വേണ്ടെന്നുവെച്ചു, പക്ഷെ വീണ്ടും ഒന്നു ശ്രമിച്ചേക്കാം തോന്നി.... ഫലമുണ്ടായി, ഒരു മൈസൂർ പാക്‌ പോലെ തന്നെ സ്വാദു തോന്നി, അതുകൊണ്ട് ബ്ലോഗിലിടാം എന്ന് വെച്ചു !!

ആവശ്യമുള്ള സാധനങ്ങൾ

കടലമാവ്                   : 1/2 കപ്പ്‌
പഞ്ചസാര                  : ഒന്നര കപ്പ്
നെയ്യ്                             : മുക്കാൽ കപ്പ്‌
എണ്ണ                             :1/4 കപ്പ്‌

ചെയ്യുന്ന വിധം

ആദ്യം തന്നെ കടലമാവ് ഒരു പരന്ന പാത്രത്തിൽ എടുക്കുക. അല്പം (ഒന്ന് രണ്ടു സ്പൂണ്‍) ചൂടായ എണ്ണ ഇതിൽ ഒഴിച്ചു നന്നായി കലർത്തുക. എന്നിട്ട് ഒരു അരിപ്പയിൽ കൂടി അരിച്ചെടുക്കുക.
ഒരു ട്രേ എടുത്ത് അതിൽ നെയ്യു തടവി വെക്കുക.

ഒരു പാത്രത്തിൽ പഞ്ചസാരയും അല്പം വെള്ളവും, അതു നനയാനുള്ള വെള്ളം മതി, ഒഴിച്ചു തിളപ്പിക്കുക.

 പാവാകുമ്പോൾ (കമ്പി പാകം) അരിച്ചുവെച്ച കടലമാവ് കുറേശ്ശെ പാവിലേക്കിടുക. ഇളക്കി കൊണ്ടിരിക്കണം.

 മറ്റൊരു പാനിൽ നെയ്യും എണ്ണയും കൂടി ചൂടാക്കുക. ഈ ചൂടായ നെയ്യ് ഓരോ കയിലായി  കുറേശ്ശെ ഇതിലേക്ക് ഒഴിച്ചു കൊടുക്കുക. ഒഴിക്കുമ്പോൾ പതഞ്ഞു വരും.

 ഇതുപോലെ നെയ്യു മുഴുവൻ ഒഴിച്ചാൽ ഈ കൂട്ട് ഒട്ടാതെ  പാത്രത്തിൽ നിന്നും വിട്ടു വരും . ഈ പാകത്തിൽ അടുപ്പിൽ നിന്നും വാങ്ങി നെയ്യു തടവിയ ട്രേയിലക്ക് പതുക്കെ ഒഴിക്കുക.

ഒന്നു ചൂടാറിയാൽ മെല്ലെ ചതുര കഷ്ണങ്ങളാക്കി വരഞ്ഞു വെക്കുക.

 ഒന്നു കൂടി തണുത്താൽ വരഞ്ഞതിൽ കൂടി മുറിച്ചെടുക്കുക. നന്നായി തണുത്ത ശേഷം ടിന്നിലാക്കി വെക്കാം. സ്വാദുള്ള മൈസൂർ പാക്‌ തയ്യാർ!!