Coriander chappathy

മല്ലിയില ചപ്പാത്തി

ആവശ്യമുള്ള സാധനങ്ങൾ :

ഗോതമ്പുമാവ്                                 : 2 കപ്പ് 

ജീരകം                                          : 1/4  ടീസ്പൂൺ

മുളകുപൊടി                                    : 1/4 ടീസ്പൂൺ

അരിഞ്ഞ മല്ലിയില                         : 2 ടേബിൾസ്പൂൺ

എണ്ണ                                             : ഒരു ടേബിൾസ്പൂൺ 

ചെയ്യുന്ന വിധം :

ഗോതമ്പുമാവ്  ജീരകവും മുളകുപൊടിയും അരിഞ്ഞ മല്ലിയിലയും  എണ്ണയും ഉപ്പും ചേർത്തി അല്പാല്പമായി വെള്ളം ചേർത്ത് കുഴക്കുക.  നല്ല മൃദുവായി കുഴച്ചുവെക്കണം. ഒരു നനഞ്ഞ തുണി മേലെ ഇട്ടു ഒരു 10 മിനിട്ടു മൂടിവെക്കുക. 

അതിനുശേഷം  അതിൽ നിന്നും ഒരു ചെറുനാരങ്ങാ വലുപ്പത്തിൽ ഒരു ഉരുളയെടുത്തു  ചപ്പാത്തി കല്ലിൽ വെച്ചു  പരത്തുക .  ഒരു തവ ചൂടാക്കി അതിൽ പരത്തിയ ചപ്പാത്തി ഇട്ട് ചെറിയ ബ്രൗൺ നിറത്തിൽ പൊള്ളിവരുമ്പോൾ തിരിച്ചും മറിച്ചും ഇട്ടു നന്നായി വെന്ത ശേഷം കല്ലിൽ നിന്നും മാറ്റുക.

ബാക്കി മാവുകൊണ്ട്  ഇതുപോലെ  ചപ്പാത്തി ഉണ്ടാക്കിയെടുക്കുക. ഇഷ്ടമുള്ള കറി ചേർത്തി ചൂടോടെ കഴിക്കാവുന്നതാണ്.

Plain Paratha

ആവശ്യമുള്ള സാധനങ്ങൾ :

ഗോതംബു മാവ്                          : 2 കപ്പ് 

ഉപ്പ് ആവശ്യത്തിന് 

എണ്ണ  ആവശ്യത്തിന് 

ചെയ്യുന്ന വിധം :

ഗോതംബു  മാവ് ആവശ്യത്തിന് ഉപ്പും കുറേശ്ശേ വെള്ളവും ചേർത്തി നന്നായി കുഴച്ചു വെക്കുക. അല്പം  എണ്ണ തടവി ഒരു നനഞ്ഞ തുണി കൊണ്ട് 5 മിനിട്ടു മൂടി വെക്കുക.

നാരങ്ങാ വലുപ്പത്തിൽ ഒരു ഉരുള എടുത്തു ചപ്പാത്തി കല്ലിൽ ചെറിയ വട്ടത്തിൽ പരത്തി  ഒരു സ്പൂൺ കൊണ്ട് അല്പം എണ്ണ തടവി നാലായി മടക്കുക.

ഇനി ഒരു ചപ്പാത്തിയുടെ അളവിൽ പരത്തുക.
ഒരു ദോശ കല്ലിൽ ഇട്ടു ചൂടാക്കി അല്പം എണ്ണ ഓരത്തു കൂടി കുറേശ്ശേ ചേർത്തി രണ്ടു ഭാഗവും വേവുന്നതു വരെ ചുട്ടെടുക്കുക.
കടല കറിയോ അല്ലെങ്കിൽ ഇഷ്ടമുള്ള  ഏതെങ്കിലും കറി ചേർത്തി കഴിക്കാം 

Lemon Rasam

നാരങ്ങ രസം ഉണ്ടാക്കാൻ വളരെ എളുപ്പമാണ്.  ഇതിൽ നാരങ്ങ ചേർത്തുന്നതു  കൊണ്ട് പ്രത്യേകിച്ചു പുളിയൊന്നും ചേർക്കേണ്ടതില്ല. ചൂടു ചോറിന്റെ കൂടെ കഴിക്കാൻ നന്നായിരിക്കും.

ആവശ്യമുള്ള സാധനങ്ങൾ :

തുവര പരുപ്പ്                                : 1/4 കപ്പ് 

തക്കാളി                                        : 1 

പച്ചമുളക്                                      : 2 എണ്ണം 

ഇഞ്ചി                                            : 1/4 " കഷ്ണം 

മഞ്ഞപ്പൊടി                                 : 1/4 ടീസ്പൂൺ 

നാരങ്ങ                                         : 1

ഉപ്പ്‌ ആവശ്യത്തിന് 

കടുക്                                            : 1 ടീസ്പൂൺ 

ജീരകം                                           : 1/8 ടീസ്പൂൺ 

നെയ്യ്                                            : 1 ടീസ്പൂൺ 

ചുവന്ന മുളക്                               : 1 രണ്ടായി പൊട്ടിച്ചത് 

മല്ലിയില അരിഞ്ഞത്                    : ഒരു ടേബിൾസ്പൂൺ 

ചെയ്യുന്ന വിധം  :

പരുപ്പ് പ്രഷർ കൂക്കറിൽ ഒരു കപ്പ് വള്ളം ഒഴിച്ചു വേവിക്കുക. 

തക്കാളി അരിഞ്ഞതും പച്ചമുളകു നീളത്തിൽ അരിഞ്ഞതും ഒരു ടീസ്പൂൺ നെയ്യിൽ വഴറ്റുക. 

ഇഞ്ചി ചെറുതായി അരിഞ്ഞതും ഇതിൽ ചേർത്തി രണ്ടു മിനിറ്റും കൂടി വഴറ്റുക.

ഇതിൽ വേവിച്ച പരുപ്പ് ഉടച്ചു ചേർക്കുക. ഇതിൽ മഞ്ഞപ്പൊടിയും ഉപ്പും രണ്ടു കപ്പ് വെള്ളവും കൂടി ചേർത്തി ഇടത്തരം  തീയിൽ അൽപ സമയം വെക്കുക. പതഞ്ഞു പൊങ്ങി വരുന്ന സമയത്തു അരിഞ്ഞു വെച്ച മല്ലിയില ചേർത്തി അടുപ്പിൽ നിന്നും മാറ്റുക. 

ബാക്കി നെയ്യു ചൂടാക്കി കടുകു പൊട്ടിച്ച്  ജീരകവും മുളകും ചേർത്തി വറുത്തു രസത്തിൽ ഒഴിക്കുക. നാരങ്ങ നീരും  ചേർത്തിയാൽ രുചിയുള്ള രസം റെഡി!!

Pumpkin soup (mathan soup)

ആവശ്യമുള്ള സാധനങ്ങൾ :

മത്തൻ                                  : 1/2 കിലോ 

വലിയ ഉള്ളി                           : 1 ഇടത്തരം 

വെളുത്തുള്ളി                        : 2 അല്ലി 

വെജിറ്റബിൾ സ്റ്റോക്ക്        : ഒരു ക്യൂബ് 

വെണ്ണ                                    :1/2 ടീസ്പൂൺ 

മൈദ                                      : ഒരു ടീസ്പൂൺ 

ഉപ്പ് അല്പം 

ക്രീം                                        : ഒരു ടേബിൾസ്പൂൺ 

ചെയ്യുന്ന വിധം :

മത്തൻ ഇടത്തരം കഷ്ണങ്ങളായി മുറിച്ചു കഴുകി വെക്കുക.  ഉള്ളിയും ഇടത്തരം വലുപ്പത്തിൽ അരിഞ്ഞു വെക്കുക.

ഒരു പ്രഷർ കുക്കറിൽ മത്തനും ഉള്ളിയും  വെളുത്തുള്ളിയും അല്പം ഉപ്പും (വെജിറ്റബിൾ ക്യൂബിൽ  ഉപ്പുണ്ടെങ്കിൽ നോക്കി വേണ്ടതു ചേർത്തിയാൽ മതി)  ഒരു രണ്ടു കപ്പ് വെള്ളവും ചേർത്ത ശേഷം വേവിക്കുക.

തണുത്ത ശേഷം കുക്കർ തുറന്നു മിക്സിയിൽ അരച്ചു വെക്കുക.

ഒരു പാനിൽ വെണ്ണ ഉരുക്കി അതിൽ മൈദയിട്ടു വറുത്തു, നിറം മാറാതെ തന്നെ പച്ചമണം പോയി നല്ല മണം വന്നാൽ അരച്ചു വെച്ച മത്തനും സ്റ്റോക്ക് ക്യൂബും ചേർത്തി അര  കപ്പ് വെള്ളവും കൂടി ചേർത്തി ചെറിയ തീയിൽ രണ്ടു മിനിട്ടു തിളപ്പിക്കുക. ക്രീം ചേർത്തി ഇളക്കുക. അടുപ്പിൽ നിന്നും മാറ്റുക.

അല്പം  ക്രീമും ഒരു  മല്ലിയിലയും കൊണ്ട് അലങ്കരിക്കുക. ചൂടോടെ വിളംബുക!!

Idli Upma

ആവശ്യമുള്ള സാധനങ്ങൾ :

ഇഡ്ഡലി                            : 4 എണ്ണം 

ചെറിയ ഉള്ളി                  : 5 എണ്ണം 

പച്ചമുളക്                        : 2 എണ്ണം 

വെളിച്ചെണ്ണ                    : 3 ടേബിൾസ്പൂൺ 

കടുക്                              : 1/2 ടീസ്പൂൺ 

ഉഴുന്നുപരിപ്പ്                   : ഒരു ടീസ്പൂൺ  

മുളകുപൊടി                   : ഒരു നുള്ള് 

കായപ്പൊടി                      : ഒരു നുള്ള് 

കറിവേപ്പില                      : 1 തണ്ട് 

ചെയ്യുന്ന വിധം :

ഇഡ്ഡലി  ചെറിയ കഷ്ണങ്ങളാക്കി പൊട്ടിച്ചെടുക്കുക,  മുളകുപൊടി മേലെ തൂവി കലർത്തിവെക്കുക.

ഉള്ളിയും പച്ചമുളകും ചെറുതായി അരിഞ്ഞു വെക്കുക. 

ഒരു ചീനച്ചട്ടിയിൽ എണ്ണ ചൂടാക്കി കടുകിട്ടു പൊട്ടിക്കുക. ഇതിൽ കറിവേപ്പിലയും ഉള്ളി അരിഞ്ഞതും ചേർത്തി വഴറ്റുക.

 അല്പം വഴറ്റിയതും പച്ചമുളകും ചേർത്തി ഒന്നുകൂടി വഴറ്റിയ ശേഷം കായപ്പൊടിയും ഇഡ്ഡലി പൊട്ടിച്ചതും ചേർത്തി നന്നായി ഇളക്കുക. എണ്ണ പോരെങ്കിൽ അല്പം കൂടി ചേർത്താവുന്നതാണ്. 

ഒരു മൂന്നു മിനിട്ടു നേരം ചെറിയ തീയിൽ വെച്ച ശേഷം അടുപ്പിൽ നിന്നും മാറ്റുക. വൈകുന്നേരം കഴിക്കാൻ ഒരു നല്ല പലഹാരമാണ്. 

Thakkali Rasam

തക്കാളി രസം 

ആവശ്യമുള്ള സാധനങ്ങൾ :

തക്കാളി                     : 3 എണ്ണം 

വേവിച്ച പരുപ്പ്           : 2 ടേബിൾസ്പൂൺ 

പുളി                           : ഒരു നാരങ്ങാ വലുപ്പത്തിൽ 

മുളകുപൊടി             : ഒരു ടീസ്പൂൺ 

മല്ലിപ്പൊടി                  : ഒരു ടീസ്പൂൺ 

മഞ്ഞപ്പൊടി              : ഒരു നുള്ള് 

വെല്ലം                         : ഒരു ചെറിയ കഷ്ണം 

നെയ്യ്                        : ഒരു ടീസ്പൂൺ 

കടുക്                        : അര ടീസ്പൂൺ 

ജീരകം                       : ഒരു നുള്ള് 

കായപ്പൊടി               : ഒരു നുള്ള് 

കറിവേപ്പില               : ഒരു തണ്ട് 

ഉപ്പ്   ആവശ്യത്തിന് 

ചുവന്ന മുളക്          ; 2 എണ്ണം രണ്ടായി പൊട്ടിച്ചത് 

മല്ലിയില                    ; രണ്ടു തണ്ട് 

ചെയ്യുന്ന വിധം :

സാംബാറിനു പെരുപ്പ് വേവിക്കുന്ന സമയത്തു ഒരു രണ്ടു ടേബിൾസ്പൂൺ പരുപ്പ്  അതിലെ വെള്ളത്തോടെ എടുത്തു അതിൽ ഒരു തക്കാളി ഉടച്ചു ചേർത്തി മാറ്റി വെക്കുക.

പുളി അരമണിക്കൂർ വെള്ളത്തിലിട്ടു വെച്ച ശേഷം  പിഴിഞ്ഞെടുത്തു വെക്കുക.

പുളിവെള്ളത്തിൽ മഞ്ഞപ്പൊടിയും മുളകുപൊടിയും മല്ലിപ്പൊടിയും ഉപ്പും വെല്ലവും ബാക്കി രണ്ടു തക്കാളി അരിഞ്ഞതും ചേർത്തി  അഞ്ചു മിനിട്ടു തിളപ്പിക്കുക.

ഇതിൽ പരുപ്പ് വെള്ളത്തിൽ തക്കാളി ചേർത്തതും ഒഴിക്കുക. ഒരു മിനിട്ടു കൂടി അടുപ്പിൽ വെച്ചു തിള വരും മുൻപേ അടുപ്പിൽ നിന്നും മാറ്റുക.

ഒരു ചീനച്ചട്ടിയിൽ നെയ്യൊഴിച്ചു ചൂടായാൽ  കടുകിട്ടു പൊട്ടിക്കുക.  ഇതിൽ ചുവന്ന മുളകു  പൊട്ടിച്ചതും  കറിവേപ്പിലയും  ചേർത്തി  രസത്തിലേക്കൊഴിക്കുക. മേലെ മല്ലിയില അരിഞ്ഞതും തൂവുക.

ചോറിന്റെ കൂടെ കഴിക്കാൻ നന്നായിരിക്കും!

Mutton Biryani

ആവശ്യമുള്ള സാധനങ്ങൾ :

ആട്ടിറച്ചി                                        : 1/2  കിലോ 

തൈര്                                            : 1/2 കപ്പ് 

മുളകുപൊടി                                 : 1 ടീസ്പൂൺ 

മീറ്റ് മസാല                                    :  1 ടേബിൾസ്പൂൺ 

മഞ്ഞപ്പൊടി                                 : 1/4 ടീസ്പൂൺ 

ഉപ്പ്‌  ആവശ്യത്തിന് 

ഇഞ്ചി വെളുത്തുള്ളി പേസ്റ്റ്      : 1 ടേബിൾസ്പൂൺ 

ആട്ടിറച്ചി നന്നായി കഴുകി ബാക്കി എല്ലാ ചേരുവകളും ഇതിൽ ചേർത്തി നന്നായി കലർത്തി ഒരു മണിക്കൂർ വെക്കുക.

മറ്റു ചേരുവകൾ :

ബാസ്മതി  അരി                               : 2 കപ്പ് 

നെയ്യ്                                               : 1 ടേബിൾസ്പൂൺ 

പട്ട                                                     : ഒരിഞ്ചു നീളത്തിൽ 

ഗ്രാംപൂ                                              : 4 എണ്ണം 

ഏലക്കായ                                        : 4 എണ്ണം 

വഴനയില (bay leaf)                         : ഒരെണ്ണം 

മട്ടൺ മസാല                                   : 1 ടേബിൾസ്പൂൺ 

ഉപ്പ് ആവശ്യത്തിന് 

ഉള്ളി                                                 : 1 വലുത് 

തക്കാളി                                           : 1 വലുത് 

ഇഞ്ചി വെളുത്തുള്ളി പേസ്റ്റ്         : 1 ടേബിൾസ്പൂൺ 

പച്ചമുളക് നീളത്തിൽ അരിഞ്ഞത്: ഒരെണ്ണം 

എണ്ണ                                                : 4 ടേബിൾസ്പൂൺ 

ഗരം മസാല                                     : 1 ടീസ്പൂൺ 

മല്ലിയില അരിഞ്ഞത്                      : 1 ടേബിൾസ്പൂൺ 

പുതിനയില അരിഞ്ഞത്                : 1 ടേബിൾസ്പൂൺ 

ചെയ്യുന്ന വിധം   :

അരി  വെള്ളത്തിൽ അരമണിക്കൂർ വെള്ളത്തിലിട്ടു വെക്കുക.

ഒരു പാത്രത്തിൽ നെയ്യു ചൂടാക്കി പട്ടയും ഗ്രാന്പുവും വഴനയിലയും ഒരു  മിനിട്ടു വറുത്ത ശേഷം അഞ്ചോ ആറോ കപ്പ് വെള്ളം ഒഴിച്ച് ഉപ്പിട്ട് തിളപ്പിക്കുക. മുക്കാൽ വേവാകുമ്പോൾ  വെള്ളത്തിൽ നിന്നും കോരി മാറ്റി വെക്കുക.

ഉള്ളി ഘനമില്ലാതെ അരിഞ്ഞു വെക്കുക.  തക്കാളി ചെറുതായി അരിഞ്ഞു വെക്കുക.

തിരുമ്മി വെച്ച ആട്ടിറച്ചി ഒരു പ്രഷർ കുക്കറിൽ അല്പം വെള്ളം വേവാൻ വെക്കുക. അഞ്ചോ ആറോ വിസിൽ വന്നാൽ അടുപ്പിൽ നിന്നും മാറ്റി തണുക്കാൻ വെക്കുക.

ഒരു ബിരിയാണി പോട്ടിൽ എണ്ണ ചൂടാക്കി അരിഞ്ഞു വെച്ച ഉള്ളി ഇളം ബ്രൗൺ നിറത്തിൽ വറുക്കുക. ഇതിൽ നിന്നും പാതി മാറ്റിവെക്കുക. ബാക്കി ഉള്ളിയുടെ കൂടെ ഇഞ്ചി വെളുത്തുള്ളി പേസ്റ്റ് ചേർത്തു വഴറ്റുക. ഇതിൽ പച്ചമുളകു ചേർത്തി തീ കുറച്ചു മട്ടൺ മസാല ചേർത്തി ഒരു മിനിട്ടു  നന്നായി ഇളക്കിയ ശേഷം തക്കാളിയും ഉപ്പും  ചേർക്കുക. തക്കാളി കുഴഞ്ഞ ശേഷം കുക്കർ തുറന്നു വെന്ത മട്ടൺ വെള്ളത്തോടെ തന്നെ ഇതിലേക്ക് ചേർക്കുക. മല്ലിയില അരിഞ്ഞതും പുതിനയില അരിഞ്ഞതും ചേർത്തി ഇളക്കി അടുപ്പിൽ വെച്ച് വെള്ളം വറ്റിയാൽ തീ കെടുത്തി വെക്കുക. പാത്രത്തിൽ ഒപ്പ്പം നിരത്തിയ ശേഷം മേലെ ചോറും  ഒപ്പം നിരത്തി വെക്കുക.

 അല്പം മല്ലിയിലയും പുതിനയിലയും അരിഞ്ഞതും,  മാറ്റി വെച്ച ഉള്ളി വറുത്തുവെച്ചതും മേലെ തൂവുക.  ഒരു സ്പൂൺ നെയ്യ് മേലെ തൂവി പാത്രം നന്നായി മൂടി ചെറിയ തീയിൽ അഞ്ചു മിനിട്ടു കൂടി വെച്ച ശേഷം തീ കെടുത്തുക.  അല്പം കഴിഞ്ഞു പാത്രം തുറന്ന് മെല്ലെ ഇളക്കി ചൂടോടെ വിളംബാം.

 

Vegetabla Biryani (without oil)

ആവശ്യമുള്ള സാധനങ്ങൾ : 

ബാസ്മതി അരി                                :  1 കപ്പ് 

കാരറ്റ്                                               :  1 ഇടത്തരം 

ബീൻസ്                                            :  100 ഗ്രാം 

ഉള്ളി                                                  :  3 എണ്ണം 

തക്കാളി                                            :  3 എണ്ണം 

തേങ്ങ ചിരവിയത്                            : 1/2  കപ്പ് 

പച്ചമുളക്                                           : 2 എണ്ണം 

ഇഞ്ചി                                                 : 1 ഇഞ്ച് നീളത്തിൽ 

വെളുത്തുള്ളി                                     : 5 എണ്ണം
മല്ലിയില/പുതിന  അരിഞ്ഞത്          : 1/4 കപ്പ് 
മഞ്ഞപ്പൊടി                        : 1/4 ടീസ്പൂൺ  

പട്ട,,ഗ്രാമ്പൂ,  ഏലക്ക പൊടിച്ചത്   : 1 ടീസ്പൂൺ 
ഉപ്പ് ആവശ്യത്തിന്
നാരങ്ങ നീര്                       ഒരു ടേബിൾസ്പൂൺ

ചെയ്യുന്ന വിധം 

കാരറ്റും ബീൻസും ഉള്ളിയും തക്കാളിയും  അരിയുക .

ബാസ്മതി അരി 20 മിനിറ്റു വെള്ളത്തിലിട്ടു വെക്കുക. 

ഒരു ഉരുളി  അടുപ്പിൽ വെച്ചു ചൂടായ ശേഷം പച്ചക്കറികൾ അതിലിട്ടു അല്പം വെള്ളം ഒഴിച്ച് ഉപ്പും മഞ്ഞപ്പൊടിയും ചേർത്തി  അടച്ചു വെച്ചു വേവിക്കുക. വെന്ത ശേഷം തുറന്നു വെച്ച്  വെള്ളം വറ്റിക്കുക. ഇതിൽ പച്ചമുളകും വെളുത്തുള്ളിയും ഇഞ്ചിയും ചതച്ചു ചേർക്കുക. ബാക്കി പകുതി പട്ടയും മറ്റും പൊടിച്ചതും ചേർത്തി നന്നായി ഇളക്കുക. ഇതിൽ  തേങ്ങ ചേർത്തി, മല്ലിയില അരിഞ്ഞതും പുതിന അരിഞ്ഞതും ചേർത്തി   പകുതി നാരങ്ങാ നീരും ചേർത്തി നന്നായി ഇളക്കി അടുപ്പു ഓഫ് ചെയ്യുക.

മറ്റൊരു പാത്രത്തിൽ വെള്ളം തിളപ്പിച്ച്  അരി കഴുകിയതു  ചേർത്തി അല്പം ഉപ്പും അര സ്പൂൺ പട്ട ഗ്രാമ്പൂ പൊടിച്ചതും ചേർക്കുക.  നാരങ്ങാ നീരും ചേർത്തി മുക്കാൽ വേവാകുമ്പോൾ അടുപ്പു ഓഫ് ചെയ്യുക.

ഒരു പരന്ന പാത്രത്തിൽ പച്ചക്കറികൾ നിരത്തി മേലെ ചോറും നിരത്തി മൂടി വെക്കുക.

അല്പം കഴിഞ്ഞു വിളംബാം. രുചിയുള്ള  ബിരിയാണി റെഡി !!

Ragi seva

കോറ സേവ

ആവശ്യമുള്ള സാധനങ്ങൾ :

റാഗിപ്പൊടി/ കോറപ്പൊടി      : 1 കപ്പ് 

ഉപ്പ്‌ ആവശ്യത്തിന് 

വെള്ളം ആവശ്യത്തിന് 

എണ്ണ  1/2 ടീസ്പൂൺ 

കടുക്                                   : 1 ടീസ്പൂൺ 

ചുവന്ന മുളക്                         : ഒരെണ്ണം രണ്ടായി മുറിച്ചു വെക്കുക.

ഉഴുന്നുപരുപ്പ്                         : 1/4  ടീസ്പൂൺ 

കറിവേപ്പില                         : ഒരു തണ്ട് 

എണ്ണ                                  : ഒരു ടേബിൾ സ്പൂൺ 

തേങ്ങ ചിരവിയത്               : 2 ടേബിൾസ്പൂൺ

ചെയ്യുന്ന വിധം :

വെള്ളം ചൂടാക്കുക. കോറപ്പൊടിയിൽ ആവശ്യത്തിന് ഉപ്പു വിതറി കലർത്തിയ ശേഷം ചൂടാക്കിയ വെള്ളം അല്പാല്പമായി ചേർത്തി നന്നായി കുഴക്കുക. എണ്ണ പുരട്ടി ഒന്നുകൂടി കുഴച്ചു വെക്കുക.

സേവനാഴിയിൽ കുഴച്ച മാവു  കുറേശ്ശേയായി ഇട്ടു ഇഡ്ഡലിത്തട്ടിലേക്കു പിഴിഞ്ഞു വെക്കുക.

പിഴിഞ്ഞ് വെച്ച ശേഷം ഇഡ്ഡലി പാത്രത്തിൽ വേവിച്ചെടുക്കുക. ബാക്കി മാവും ഇതുപോലെ ചെയ്യുക.

ഒരു ചീനച്ചട്ടിയിൽ എണ്ണ  ചൂടാക്കി  കടുകിട്ടു പൊട്ടുമ്പോൾ ഉഴുന്നു പരുപ്പും ചുവന്ന മുളകും ഇട്ടു ഇളക്കിയശേഷം കറിവേപ്പിലയും ചേർത്തുക.

ഇതിൽ വേവിച്ചു വെച്ച കോറ ഇടിയപ്പം പൊട്ടിച്ചു ചേർത്തി ഇളക്കുക. മേലെ തേങ്ങ ചിരവിയതും തൂവി ചട്ണിയോ ഉരുളക്കിഴങ്ങു സ്ട്യുവോ ചേർത്തി കഴിക്കാം.

Chicken soup

കോഴി സൂപ്പ് 

ആവശ്യമുള്ള സാധനങ്ങൾ 

കോഴി എല്ലോടുകൂടിയ കഷ്ണം              : 2 

കാരറ്റ്                                                    : ഒരു ചെറുത് 

ക്യാപ്സിക്കം                                             : ഒരു കാൽ ഭാഗം 

പട്ട                                                          :ഒരു ചെറിയ കഷ്ണം 

വലിയ ഉള്ളി                                          : ഒരു പകുതി 

ഗ്രാംപൂ                                                  : 3 എണ്ണം 

വെളുത്തുള്ളി                                       : 2 എണ്ണം 

കുരുമുളകുപൊടി                               : 1/8 ടീസ്പൂൺ 

ഉപ്പ്‌ ആവശ്യത്തിന് 

വെണ്ണ                                                  : ഒരു ടീസ്പൂൺ 

കോൺഫ്ലവർ                                      : ഒരു ടീസ്പൂൺ 

ചെയ്യുന്ന വിധം 

ഉള്ളിയും ക്യാപ്സിക്കവും ചെറിയ ചതുര കഷണങ്ങളായി മുറിച്ചുവെക്കുക.

ഒരു പാനിൽ വെണ്ണ ചൂടാക്കി പട്ട, ഗ്രാംപൂ എന്നിവ ഇട്ടു ചൂടായ ശേഷം വെളുത്തുള്ളി അരിഞ്ഞതിട്ടു വഴറ്റുക. ഇതിൽ ഉള്ളിയും ക്യാപ്സിക്കവും കോഴി കഷ്ണവും കാരറ്റ് വട്ടത്തിലരിഞ്ഞതും എല്ലാം ഇട്ടു ഒന്നു വഴറ്റിയ ശേഷം 3  കപ്പ് വെള്ളം ഒഴിച്ച് ഉപ്പിട്ട ശേഷം നന്നായി തിളപ്പിക്കുക.  

കോഴി കഷണങ്ങൾ നന്നായി വേവിക്കുക. കോഴികഷ്ണങ്ങൾ എല്ലിൽ നിന്നും അടർത്തിയെടുത്തു എല്ലു കളയുക. പട്ടയും ഗ്രാന്പുവും എടുത്തുമാറ്റി കോൺഫ്ലവർ കാൽ കപ്പു വെള്ളത്തിൽ കലക്കി ഒഴിക്കണം. ഒന്നുകൂടി തിളപ്പിച്ച  ശേഷം അടുപ്പിൽ നിന്നും മാറ്റുക. വിളംബുന്ന പാത്രത്തിലേക്കു മാറ്റി കുരുമുളകുപൊടി മേലേതൂവി ചൂടോടെ കുടിക്കാം.

Vegetable kabab

ആവശ്യമുള്ള സാധനങ്ങൾ :

ഉരുളക്കിഴങ്ങ്  പുഴുങ്ങിയത്       : 1 

കാരറ്റ്  ചീകിയത്                          : 1/4 കപ്പ് 

ക്യാബേജ്‌ ചീകിയത്                    : 2 ടേബിൾസ്പൂൺ 

കോളിഫ്ലവർ ചീകിയത്                : 1/4 കപ്പ് 

പച്ചമുളക്                                     : 3 എണ്ണം  അരിഞ്ഞത് 

ഇഞ്ചി അരിഞ്ഞത്                      : 1 ടേബിൾസ്പൂൺ 

മൈദ                                             : ഒന്നര കപ്പ് 

മുളകുപൊടി                                : 1/2  ടീസ്പൂൺ 

ഉരുക്കിയ വെണ്ണ                          : 1 ടേബിൾസ്പൂൺ 

അരിഞ്ഞ മല്ലിയില                       : 1/4 കപ്പ് 

ഉപ്പ്‌  ആവശ്യത്തിന് 

എണ്ണ വറുക്കാൻ ആവശ്യത്തിന് 

ചെയ്യുന്ന വിധം :

ഒരു  പാനിൽ വെണ്ണ ഉരുക്കിയത് ചൂടാക്കി ചീകിയ കോളിഫ്ലവറും ക്യാബേജും വഴറ്റി അതിൽ പുഴുങ്ങിവെച്ച ഉരുളക്കിഴങ്ങു പൊടിച്ചതും അരിഞ്ഞുവച്ച ഇഞ്ചിയും പച്ചമുളകും ചീകിയ കാരറ്റും മുളകുപൊടിയുംഉപ്പും  എല്ലാം ചേർത്തി  2  മിനിട്ടു കൂടി  വഴറ്റിയ ശേഷം അടുപ്പിൽ നിന്നും മാറ്റി തണുക്കാൻ വെക്കുക.  ഇതിൽ ഒരു ടീസ്പൂൺ എണ്ണയും മൈദയും മല്ലിയിലയും ചേർത്തി  നന്നായി കലർത്തി നാരങ്ങാ വലുപ്പത്തിലുള്ള ഉരുളകളാക്കുക.

ഒരു ചീനച്ചട്ടിയിൽ വറുക്കാനുള്ള എണ്ണ ചൂടാക്കി ഓരോ ഉരുളയും കൈയിൽ എടുത്തു ചെറുതായി പരത്തി എണ്ണയിലേക്കിട്ടു (ഇടക്കിളക്കണം)  ഇളം ബ്രൗൺ നിറമായാൽ വറുത്തു കോരുക. കോരിയെടുത്തശേഷം പേപ്പർ ടവ്വലിൽ ഇട്ടു എണ്ണ വാലാൻ വെക്കുക. ചൂടോടെ ഗ്രീൻ ചട്ണി കൂട്ടി കഴിക്കാം.  

• ഇതിൽ പനീർ പൊടിച്ചതും  വേണമെങ്കിൽ  ചേർക്കാവുന്നതാണ്.

Morappam

മോരപ്പം 

മോരപ്പം  രണ്ടു വിധത്തിൽ ഉണ്ടാക്കാം.  ദോശമാവിൽ കടുകും ഉള്ളിയും മറ്റും വറുത്തിട്ടുണ്ടാക്കാം  അല്ലെങ്കിൽ പച്ചരി അരച്ച് അതിൽ അല്പം മോരൊഴിച്ചു കടുകും ഉള്ളിയും വറുത്തിട്ടുണ്ടാക്കാം 

ഇവിടെ ഞാൻ ദോശ മാവിലാണ് ഉണ്ടാക്കിയത്.

ആവശ്യമുള്ള സാധനങ്ങൾ :

ദോശ മാവ്                                           : 2 കപ്പ് 

ചെറിയ ഉള്ളി                                       : 6 എണ്ണം, ചെറുതായരിഞ്ഞത്  

പച്ചമുളക്                                            : 2 എണ്ണം ചെറുതായരിഞ്ഞത് 

 ഇഞ്ചി                                                 : അര ഇഞ്ചു നീളത്തിൽ ചെറുതായരിഞ്ഞത് 

കടുക്                                                  : 1 ടീസ്പൂൺ 

എണ്ണ   വറുക്കാൻ വേണ്ടത് 

കറിവേപ്പില                                         : ഒരു തണ്ട് 

ചെയ്യുന്ന വിധം :

ഒരു ടീസ്പൂൺ എണ്ണ ചൂടാക്കി അതിൽ കടുകിട്ട്  പൊട്ടുംബോൾ  കറിവേപ്പിലയും അരിഞ്ഞു വെച്ച ഉള്ളിയും ഇഞ്ചിയും പച്ചമുളകും അരിഞ്ഞതും ചേർത്തി വഴറ്റിയ ശേഷം മാവിൽ ചേർത്തി നന്നായി ഇളക്കുക.

അപ്പകല്ല് അടുപ്പത്തു വെച്ചു ഓരോ കുഴിയിലും ഓരോ ടീസ്പൂൺ എണ്ണ ഒഴിച്ചു  ചൂടായാൽ ഓരോ തവി മാവെടുത്തു ഓരോ കുഴിയിലും ഒഴിക്കുക.  

അടിഭാഗം വെന്താൽ  (ഏകദേശം ഒരു മൂന്നു മിനിട്ടു കഴിഞ്ഞാൽ)  തിരിച്ചിടണം.

രണ്ടുഭാഗവും വെന്താൽ കല്ലിൽ നിന്നും എടുത്തു മാറ്റാം.

ബാക്കി മാവും ഇതുപോലെ ഉണ്ടാക്കി എടുക്കുക.  വൈകുന്നേരത്തെ ചായയുടെ കൂടെ കഴിക്കാൻ നല്ല ഒരു പലഹാരമാണ്.!

Zucchini moru curry

സൂക്കിനി മോരു കറി 

ആവശ്യമുള്ള സാധനങ്ങൾ :

സൂക്കിനി                            : 2 എണ്ണം 

തേങ്ങ ചിരവിയത്              : 1 കപ്പ് 

പച്ചമുളക്                            : 3 എണ്ണം 

ജീരകം                                 : 1/8 ടീസ്പൂൺ 

തൈര്                                 : 1 കപ്പ് 

മഞ്ഞപ്പൊടി                       : 1/4 ടീസ്പൂൺ 

ഉപ്പ് ആവശ്യത്തിന് 

കടുകു വറുക്കാൻ :

കടുക്                                  : 1 കപ്പ് 

ചുവന്ന മുളക്                    : 2 എണ്ണം, രണ്ടായി പൊട്ടിച്ചത് 

കറിവേപ്പില                         : ഒരു തണ്ട് 

എണ്ണ                                   : 1 ടേബിൾസ്പൂൺ 

ചെയ്യുന്ന വിധം  :

സൂക്കിനി  ചെറിയ ചതുര കഷ്ണങ്ങളാക്കി മുറിച്ചു വെക്കുക.

പച്ചമുളകും തേങ്ങയും ജീരകവും കൂടി നന്നായി അരച്ചുവെക്കുക.

സൂക്കിനി മഞ്ഞപ്പൊടിയും ഉപ്പും ചേർത്തി വേവിക്കുക.

വെന്ത ശേഷം അരച്ചുവെച്ച തേങ്ങ ഒഴിച്ച ശേഷം ഒന്ന് തിളപ്പിക്കുക.

ഇതിൽ തൈര് ഉടച്ചു ചേർത്തി ഇളക്കുക.  തീ  കുറച്ചു 2 മിനിട്ടു വെച്ച ശേഷം തിളക്കും മുൻപേ തന്നെ അടുപ്പിൽ നിന്നും മാറ്റുക.

ഒരു പാനിൽ എണ്ണ  ചൂടാക്കി  കടുകിട്ടു പൊട്ടുംബോൾ ചുവന്ന മുളകും കറിവേപ്പിലയും ചേർത്തി ഈ കറിയിലേക്ക്  ഒഴിക്കുക. 

വിളംബുന്ന പാത്രത്തിലേക്കു മാറ്റി ചൂടു ചോറിന്റെ കൂടെ കഴിക്കാം!!

 

Moong sprout biryani

മുളപ്പിച്ച ചെറുപയർ ബിരിയാണി  

ആവശ്യമുള്ള സാധനങ്ങൾ :

ചെറുപയർ  മുളപ്പിച്ചത്        : 1/2  കപ്പ് 

ചോറുണ്ടാക്കാൻ :

ബാസ്മതി അരി                    : 1 കപ്പ് 

ഗ്രാംപൂ                                 : 2 എണ്ണം 

പട്ട                                        : 1 ഇഞ്ചു നീളത്തിൽ 

നെയ്യ്                                   : 2 ടീസ്പൂൺ 

ഉപ്പ് ആവശ്യത്തിന് 

അരക്കാൻ വേണ്ടത് :

വലിയ ഉള്ളി                       : ഇടത്തരം ഒന്ന് 

തക്കാളി                             : 1 

പച്ചമുളക്                          : 2 എണ്ണം 

ഇഞ്ചി                                : 1/2 ഇഞ്ചു നീളത്തിൽ 

വെളുത്തുള്ളി                   : 3 എണ്ണം 

പുതിനയില                      : ഒരു പിടി 

മസാലക്കു വേണ്ടത് :

ഉള്ളി                                 : 2 എണ്ണം നീളത്തിൽ അരിഞ്ഞത് 

കട്ടതൈര്                         : 1/2  കപ്പ് 

വഴനയില (bayleaf)         : 1

പെരുംജീരകം                  : 1 ടീസ്പൂൺ 

പട്ട                                    : ഒരിഞ്ചു നീളത്തിൽ 

ഏലക്ക                            : 2 എണ്ണം 

ഗ്രാംപൂ                            : 3 എണ്ണം 

മഞ്ഞപ്പൊടി                   : 1/4 ടീസ്പൂൺ 

മുളകുപൊടി                  : 1 ടീസ്പൂൺ 

മല്ലിപ്പൊടി                       : 1 ടീസ്പൂൺ 

പച്ചമുളക്                       : 2 എണ്ണം നീളത്തിൽ രണ്ടായി പിളർന്നത് 

ഉപ്പ്  ആവശ്യത്തിന് 

എണ്ണ                              : ഒരു ടീസ്പൂൺ 

നെയ്യ്                             : ഒരു ടീസ്പൂൺ 

ചെയ്യുന്ന വിധം :

ചെറുപയർ നേരത്തെ മുളപ്പിച്ചു വെക്കണം അല്ലെങ്കിൽ മാർക്കറ്റിൽ നിന്നും വാങ്ങിവെക്കുക.
മുളപ്പിച്ച ചെറുപയർ തിളച്ച വെള്ളം ചേർത്തി ഒന്നു വേവിച്ചു വെക്കുക.

അരക്കാൻ വേണ്ടത് എന്ന ലിസ്റ്റിലുള്ള എല്ലാം കൂടി അരച്ചുവെക്കുക.
ഉള്ളി ഘനമില്ലാതെ നീളത്തിൽ അരിഞ്ഞു വെക്കുക. പച്ചമുളക് നീളത്തിൽ കീറിവെക്കുക.

അരി കഴുകി ഒരു മുപ്പതു മിനിട്ടു  കുതിർത്തുക.
ഒരു പാനിൽ നെയ്യു ചൂടാക്കി പട്ടയും ഗ്രാംപൂവു  ഒന്നു ചെറുതായി വറുത്തുവെക്കുക.
ഒരു പാത്രത്തിൽ  4-5 കപ്പ് വെള്ളം തിളപ്പിച്ചു,  ഉപ്പും വറുത്തുവെച്ച പട്ടയും ഗ്രാന്പുവും  ആ നെയ്യോടെ അതിൽ ഒഴിച്ച  ശേഷം കഴുകി വെച്ച അരി വാരി ഇതിൽ ഇട്ടു ഒരു മുക്കാൽ വേവാകുന്നതു വരെ വേവിച്ചു വെള്ളം വാലാൻ വെക്കുക.

ഒരു പാനിൽ നെയ്യു ചൂടാക്കി പട്ടയും ഗ്രാന്പുവും  ഏലക്കയും വഴനയിലയും പെരുംജീരകവും വറുത്ത ശേഷം അതിൽ നീളത്തിൽ അരിഞ്ഞു വെച്ച  ഉള്ളിയും പച്ചമുളകും ഇട്ടു വഴറ്റുക. ഇതിൽ അരച്ചുവെച്ച ഉള്ളി തക്കാളി മിശ്രിതം ചേർത്തി ഒരു മൂന്നു മിനിട്ടു വഴറ്റുക.

ഇതിൽ തൈരു ചേർത്തി ഇളക്കുക.

ഇതിൽ മുളകുപൊടിയും മല്ലിപ്പൊടിയും മഞ്ഞപ്പൊടിയും വേവിച്ചു വെച്ച ചെറുപയറും ഉപ്പും ചേർത്തി നന്നായി ഇളക്കുക.  ഇനി വേവിച്ചു വെച്ച ചോറും ചേർത്തി ഒപ്പം ചെറുതീയിൽ 2  മിനിട്ടു വെച്ച്  ഇളക്കിയ ശേഷം  തീ കെടുത്തി മല്ലിയില തൂവുക.

• വറുത്ത അണ്ടിപരുപ്പോ ബദാമോ  ഇഷ്ടമാണെങ്കിൽ മേലെ തൂവാം.
• വിളംബുന്ന പാത്രത്തിലേക്കു മാറ്റി  ചൂടോടെ കഴിക്കാം!

Avakka manga /Avakka mango

ആവക്ക മാങ്ങ അച്ചാർ 

ആവശ്യമുള്ള സാധനങ്ങൾ :

പച്ച മാങ്ങ                                   : 3 എണ്ണം 

മുളകുപൊടി                              : 1 കപ്പ് 

കടുകു പൊടി                             : 1/4 കപ്പ് മുളക് 

ഉലുവപൊടി                               : 1/4 കപ്പ് 

നല്ലെണ്ണ                                      : ഒന്നേകാൽ കപ്പ് 

കല്ലുപ്പ്                                         : 3/4 കപ്പ് 

വെളുത്തുള്ളി                             : 1/2 കപ്പ് 

മാങ്ങ നന്നായി കഴുകി തുടച്ചെടുക്കണം.

മാങ്ങ മൂത്തതായിരിക്കണം, അണ്ടി അല്പം മൂത്തു തുടങ്ങിയിക്കണം. മുറിക്കുംബോൾ അണ്ടിയോടെ ഇടത്തരം ചെറിയ കഷ്ണങ്ങളായി മുറിച്ചെടുക്കണം. എന്നിട്ടു അണ്ടിയെടുത്തു മാറ്റുക.  ഇത് അൽപനേരം ഒരു തുണിയിൽ വെയിലത്തു വെക്കുക.

മുളകു ഉണക്കി പൊടിച്ചെടുത്തത് ഉപയോഗിക്കുന്നതാണു നല്ലത്.

ആവക്ക മാങ്ങ നല്ല എരിവുള്ളതാണ്, നല്ല ചുവപ്പു നിറമുള്ളതായിരിക്കണം. അതുകൊണ്ട് കാശ്മീരി മുളകും എരിവുള്ള ചുവപ്പു മുളകും  ചേർത്തിയാണ് ഞാൻ ഉണ്ടാക്കിയത്.

മുളകും ഉലുവയും കടുകും വേറെ വേറെ ഉണക്കി പൊടിക്കുക.

കല്ലുപ്പും പൊടിച്ചുവെക്കുക.

വെളുത്തുള്ളി തോലു കളഞ്ഞു വെക്കുക.

മുളകുപൊടിയും ഉലുവപൊടിയും കടുകുപൊടിയും ഉപ്പുപൊടിയും വെളുത്തുള്ളിയും  മുക്കാൽ കപ്പ് എണ്ണയും കൂടി ഒരു പാത്രത്തിൽ നന്നായി കലർത്തി വെക്കുക.

എല്ലാം കൂടി ഒരു ഭരണിയിൽ ഇട്ടു  ഒരു കാൽ കപ്പ് എണ്ണ മേലെ ഒഴിച്ചു ഒരു തുണി കൊണ്ടു മൂടി കെട്ടി വെക്കുക. 

ഒരു മൂന്നു ദിവസം ഇങ്ങിനെ തൊടാതെ വെക്കണം. നാലാം ദിവസം തുറന്നു ഒരു നല്ല ഉണങ്ങിയ സ്പൂൺ കൊണ്ടു  ഇളക്കുക.  ബാക്കി എണ്ണയും മേലെ ഒഴിച്ചു വീണ്ടും ഒരു നാലു ദിവസം 

കൂടി മൂടി വെക്കുക.

ഇപ്പോൾ അച്ചാർ ഉപയോഗിക്കാൻ തുടങ്ങാം.  ചോറിനും ചപ്പാത്തിക്കും എല്ലാം നന്നായിരിക്കും.

Cornflakes mixture

ആവശ്യമുള്ള സാധനങ്ങൾ :

കോൺ ഫ്ലേക്സ്                            : 2 കപ്പ് 

അവിൽ                                      : 1 കപ്പ് 

നിലക്കടല / കപ്പലണ്ടി               : 3/4 കപ്പ് 

അണ്ടിപരുപ്പ്                              : 1/4 കപ്പ് 

മുളകുപൊടി                              : 1 ടീസ്പൂൺ 

ഉപ്പ്                                              : 3/4 ടീസ്പൂൺ 

പഞ്ചസാര                                 : 1/2 ടീസ്പൂൺ 

എണ്ണ വറുക്കാൻ ആവശ്യത്തിന് 

കറിവേപ്പില                                : 2 തണ്ട് 

ചെയ്യുന്ന വിധം :

മുളകുപൊടിയും പഞ്ചസാരയും ഉപ്പും കൂടി കലർത്തി വെക്കുക.

എണ്ണ ചൂടാക്കി അവിൽ ചൂടായ എണ്ണയിൽ ഇട്ടു വറുത്തു കോരുക.

അതേ എണ്ണയിൽ തന്നെ അണ്ടിപരുപ്പ്  വറുത്ത ശേഷം നിലക്കടലയും വറുക്കുക.

അതിനു ശേഷം കറിവേപ്പിലയും വറുത്തെടുക്കുക.

ഈ വറുത്തുവെച്ചതെല്ലാം കോൺ ഫ്ലേക്സിൽ കലർത്തി വെക്കുക. ഇതിൽ മുളകുപൊടിയും പഞ്ചസാരയും ഉപ്പും കലർത്തി നന്നായി ഇളക്കി വെക്കുക. വായു കടക്കാത്ത ഒരു കുപ്പിയിലൊ പ്ലാസ്റ്റിക് പാത്രത്തിലോ സൂക്ഷിച്ചു വെക്കാവുന്നതാണ്.

• കോൺ ഫ്ലേക്സ്  വേണമെങ്കിൽ എണ്ണയിൽ വറുത്തും ചേർക്കാം...ഞാൻ വറുക്കാതെയാണ് ചേർത്തിയത്.

Ulli parukku

ഉള്ളി പരുക്ക് 

ആവശ്യമുള്ള സാധനങ്ങൾ :

ചെറിയ ഉള്ളി                     : 10  എണ്ണം 

കട്ടി തൈര്                        : 1/4 കപ്പ്, ഉടച്ചുവെക്കുക 

ചുവന്ന മുളക്                  : 2 എണ്ണം 

കടുക്                                : 1/2  ടീസ്പൂൺ 

ഉപ്പ്  ആവശ്യത്തിന് 

എണ്ണ                                 : 1 ടീസ്പൂൺ 

കറിവേപ്പില                        : ഒരു തണ്ട് 

അരക്കാൻ  :

തേങ്ങ  ചിരവിയത്          : 1/2  കപ്പ് 

പച്ചമുളക്                         ; 2 എണ്ണം 

കടുക്                               : 1/4 ടീസ്പൂൺ 

ചെയ്യുന്ന വിധം :

ഉള്ളി ചെറുതായി അരിഞ്ഞു വെക്കുക.

തേങ്ങയും പച്ചമുളകും നന്നായി അരച്ചുവെക്കുക. കടുക് ചെറുതായി ഒന്ന് ചതച്ചെടുക്കുക .

ഒരു പാനിൽ എണ്ണ ചൂടാക്കി കടുക് പൊട്ടിക്കുക. ഇതിൽ മുളകു പൊട്ടിച്ചതും കറിവേപ്പിലയും ചേർത്തി ഇളക്കുക. ഇതിൽ അരിഞ്ഞ ഉള്ളിയും ഉപ്പും ചേർത്തി വഴറ്റുക.

നിറം മാറുമ്പോൾ    അരച്ചുവെച്ച തേങ്ങയും ചതച്ച കടുകും ഉടച്ച തൈരും ഇതിൽ ചേർത്തുക. 

തിളക്കും മുമ്പ്  അടുപ്പിൽ നിന്നും വാങ്ങിവെക്കുക. ചോറിന്റെ കൂടെ കഴിക്കാൻ നന്നായിരിക്കും.  

Thakkali seva / Tomato seva

നൂൽ പുട്ടു പിഴിഞ്ഞതു പൊട്ടിച്ചു കടുകുവറുത്താൽ സേവയായി.  സേവ തന്നെ  പലവിധം ഉണ്ടാക്കാം. നാരങ്ങ സേവ, തേങ്ങ സേവ, പച്ചക്കറി സേവ , തക്കാളി സേവ എന്നിങ്ങനെ.
ആദ്യം നൂൽപുട്ടുണ്ടാക്കുക.

എന്നിട്ടു കൈകൊണ്ടു അടർത്തിയെടുത്തു വെക്കുക.

ആവശ്യമുള്ള സാധനങ്ങൾ:

പിഴിഞ്ഞ് വെച്ച സേവ          : 2 കപ്പ് 

വലിയ ഉള്ളി                          : 1 അരിഞ്ഞത് 

പച്ചമുളക്                              : 2 എണ്ണം അരിഞ്ഞത്
ചുവന്ന മുളക്                      : 1 രണ്ടായി പൊട്ടിച്ചത് 

തക്കാളി                                : 1 വലുത് അരിഞ്ഞത് 

മഞ്ഞപ്പൊടി                          : ഒരു നുള്ള് 

മുളകുപൊടി                         : 1/4 ടീസ്പൂൺ
പെരുംജീരകം                        : 1/4 ടീസ്പൂൺ
എണ്ണ                                     : 1 ടേബിൾസ്പൂൺ
കടുക്                                    : 1 ടീസ്പൂൺ
ഉഴുന്ന് പരുപ്പ്                        : 1/4 ടീസ്പൂൺ
കറിവേപ്പില                            : 1 തണ്ട്
മല്ലിയില അരിഞ്ഞത്            : 1 ടേബിൾസ്പൂൺ

ചെയ്യുന്ന വിധം :

ഒരു ചീനച്ചട്ടിയിൽ എണ്ണയൊഴിച്ചു ചൂടായാൽ കടുകും ഉഴുന്നുപരുപ്പും പൊട്ടിച്ച ചുവന്ന മുളകും ഇട്ടു കടുകു പൊട്ടിയാൽ കറിവേപ്പിലയും പെരുംജീരകവും ഇട്ടു ഒന്നു വഴറ്റിയ ശേഷം അരിഞ്ഞുവെച്ച ഉള്ളിയും പച്ചമുളകും  ചേർത്തി ഒരു മിനിട്ടു വഴറ്റുക.

 തീ കുറച്ചു മുളകുപൊടിയും മഞ്ഞപ്പൊടിയും ചേർത്തി നന്നായി ഇളക്കിയ ശേഷം തക്കാളി അരിഞ്ഞതും ഉപ്പും  ചേർത്തി വഴറ്റുക. 

 തക്കാളി കുഴഞ്ഞ ശേഷം സേവ ചേർത്തി  നന്നായി ഇളക്കി അടുപ്പിൽ നിന്നും വാങ്ങി വിളംബുന്ന പാത്രത്തിലേക്കു മാറ്റുക.

 മേലെ മല്ലിയില അരിഞ്ഞതു തൂവി ചൂടോടെ കഴിക്കാം.

  

Manga chammanthy

ആവശ്യമുള്ള സാധനങ്ങൾ :

തേങ്ങ                                          : കാൽ മൂടി 

പച്ചമുളക്                                    : 3 എണ്ണം 

ഇഞ്ചി                                          : ഒരു ചെറിയ കഷ്ണം 

പച്ചമാങ്ങ                                    :  ഒരു പകുതി 

ഉപ്പ് ആവശ്യത്തിന് 

ചെയ്യുന്ന വിധം :

പച്ചമുളകും  തേങ്ങയും ഇഞ്ചിയും മാങ്ങയും ഉപ്പും എല്ലാം കൂടി മിക്സിയിൽ ഇട്ടു നന്നായി അരക്കുക.  വിളംബുന്ന  പാത്രത്തിലേക്കു മാറ്റുക.

കഞ്ഞിക്കും ചോറിനും എല്ലാം ചേരുന്ന ഒരു ചമ്മന്തിയാണിത്!

Thakkali Curry /Chettinad style

തക്കാളി കറി

ആവശ്യമുള്ള സാധനങ്ങൾ:

തക്കാളി                            :3 എണ്ണം 

വെളുത്തുള്ളി                      : 3 അല്ലി 

ഉപ്പ്  ആവശ്യത്തിന് 

മഞ്ഞപ്പൊടി                    : 1/8 ടീസ്പൂൺ 

പട്ട                                 : ഒരിഞ്ചു നീളത്തിൽ 

ജീരകം                           : ഒരു നുള്ള് 

എണ്ണ                              : 1 ടേബിൾസ്പൂൺ 

കറിവേപ്പില                    : ഒരു തണ്ട് 

മല്ലിയില അരിഞ്ഞത്       : ഒരു ടീസ്പൂൺ

അരക്കാൻ :

ചിരവിയ തേങ്ങ               : 1/2 കപ്പ് 

പെരുംജീരകം                  : 1/4 ടീസ്പൂൺ 

അണ്ടിപരുപ്പ്                   : 5 എണ്ണം 

മല്ലിപ്പൊടി                       : 1 ടീസ്പൂൺ 

മുളകുപൊടി                     : 1/2 ടീസ്പൂൺ 

വഴറ്റി അരക്കാൻ:

എണ്ണ                             : 1 ടീസ്പൂൺ  

ചെറിയ ഉള്ളി                 : 12- 15 എണ്ണം 

ചെയ്യുന്ന വിധം :

തേങ്ങയും പെരുംജീരകവും അണ്ടിപരിപ്പും മല്ലിപ്പൊടിയും മുളകുപൊടിയും  കൂടി മിക്സിയിൻ ഇട്ടു നന്നായി അരച്ചുവെക്കുക.

ഒരു സ്പൂൺ എണ്ണയിൽ ചെറിയ ഉള്ളി ഇട്ട്  ചെറുതായി നിറം മാറുമ്പോൾ തീയിൽ നിന്നും മാറ്റി ആറാൻ വെക്കുക. ആറിയ ശേഷം അരച്ചുവെക്കുക.

ഒരു പാനിൽ എണ്ണയൊഴിച്ചു  ചൂടായ ശേഷം പട്ടയും ജീരകവും ഇട്ടു ഒന്നു വറുത്ത ശേഷം വെളുത്തുള്ളി അരിഞ്ഞതു ചേർത്തി ഇളം ബ്രൗൺ നിറം വരുന്നതുവരെ വഴറ്റുക.  ഇതിൽ അരച്ചുവെച്ച തേങ്ങ മിശ്രിതം ഇട്ട് ഒരു മൂന്നു മിനിറ്റോളം വഴറ്റുക. 

 അതിനു ശേഷം അരച്ചു  വെച്ച ഉള്ളിയും ചേർത്ത്  ഒരു രണ്ടു മിനിട്ടു നേരം വഴറ്റിയ ശേഷം തക്കാളി അരിഞ്ഞതു ചേർക്കുക.  ഉപ്പും മഞ്ഞപ്പൊടിയും ചേർത്തി തക്കാളി കുഴയുന്നതുവരെ വഴറ്റി അര കപ്പു വെള്ളവും ചേർത്തി നന്നായി വേവിക്കുക. ഒന്നു കുറുകി വരുമ്പോൾ മല്ലിയില അരിഞ്ഞതും കറിവേപ്പിലയും ചേർത്തുക. 

ചോറിനും ചപ്പാത്തിക്കും എല്ലാം ചേരുന്ന കറിയാണിത്.  

 

Ragi Dosa/Kora Dosa

കോറ ദോശ

ആവശ്യമുള്ള സാധനങ്ങൾ :

റാഗി                                : 2 കപ്പ് 

ഉഴുന്ന്                               : 1/4  കപ്പ് 

ഉപ്പ്‌ ആവശ്യത്തിന് 

എണ്ണ ആവശ്യത്തിന് 

ചെയ്യുന്ന വിധം:

റാഗി  അല്ലെങ്കിൽ കോറ മുളപ്പിച്ച ശേഷമാണ് ഈ ദോശ ഉണ്ടാക്കുന്നത്. 

കോറ ഒരു ദിവസം മുഴുവൻ വെള്ളത്തിലിട്ടു വെക്കുക. എന്നിട്ടു വെള്ളത്തിൽ നിന്നും വാരിയെടുത്ത ശേഷം ഒരു നനുത്ത തുണിയിൽ കെട്ടി വെക്കുക.  എല്ലാ 5 മണിക്കൂർ കൂടുമ്പോഴും അല്പം വെള്ളം തളിച്ചു കൊടുക്കുക. 24 മണിക്കൂർ കഴിഞ്ഞാൽ ചെറുതായി മുളച്ചു  വരുന്നതു കാണാം. ഇനിയും സമയം വെച്ചാൽ കൂടുതൽ നീളത്തിലുള്ള മുള വരും.

ഉഴുന്ന് ഒരു മണിക്കൂർ വെള്ളത്തിലിട്ടു വെക്കുക.  ഉഴുന്നും റാഗിയും വെവ്വേറെ അരക്കുക. എന്നിട്ടു ഉപ്പും ചേർത്തി ഒന്നിച്ചു കലക്കി  ഒരു രാത്രി മുഴുവൻ പുളിക്കാൻ വെക്കുക.

അടുത്ത ദിവസം രാവിലെ മാവ്  ഒന്നുകൂടി കലക്കുക.  ഒരു ദോശ തവയെടുത്തു ചൂടാക്കി  അതിൽ ഒരു കയിൽ മാവെടുത്തു  തവയുടെ നടുവിൽ ഒഴിച്ച്  ഘനമില്ലാതെ പരത്തി അല്പം എണ്ണ ചുറ്റും തൂവുക.

ഒരു ഭാഗം മൊരിഞ്ഞ ശേഷം തിരിച്ചിടുക. രണ്ടുഭാഗവും വെന്ത ശേഷം കല്ലിൽ നിന്നും വാങ്ങിവെക്കുക.
തീരെ ഘനമില്ലാതെ പരത്തുകയാണെങ്കിൽ തിരിച്ചിടേണ്ട ആവശ്യമില്ല, മൊരിഞ്ഞതും മടക്കി കല്ലിൽ നിന്നും വാങ്ങുക. ഇങ്ങനെ ബാക്കി മാവും ദോശ ചുടുക.  പിന്നെ  തേങ്ങാ ചട്ണിയോ  ഉള്ളി ചട്ണിയോ ഏതെങ്കിലും കൂട്ടി കഴിക്കാം.